ടി. പത്മനാഭന്റെ പ്രതികരണം വസ്തുതകള്‍ മനസിലാക്കാതെ; വേദനിപ്പിച്ചുവെന്ന് എം.സി ജോസഫൈന്‍

വയോധികയെ അവഹേളിച്ചെന്ന പരാതിയില്‍ വിശദീകരണവുമായി വനിതാ കമ്മീഷന്‍ അധ്യക്ഷ എംസി ജോസഫൈന്‍. പ്രചാരണം വസ്തുതാ വിരുദ്ധമാണ്. സ്ത്രീകളെ അവഹേളിക്കുന്ന സമീപനം കമ്മീഷന്റെ ഭാഗത്ത് നിന്ന് ഉണ്ടായിട്ടില്ലെന്നും ജോസഫൈന്‍ പറഞ്ഞു.പരാതിക്കാരിക്ക് വേണ്ടി സംസാരിച്ചയാള്‍ തെറ്റിദ്ധരിപ്പിച്ചതാണ്. ശബ്ദരേഖ എഡിറ്റ് ചെയ്ത് കമ്മീഷനെതിരെ പ്രചാരണം നടത്തി. കഥാകൃത്ത് ടി. പത്മനാഭന്റെ പരാമര്‍ശം വസ്തുതകള്‍ പരിശോധിക്കാതെയുള്ളതാണ്. അദ്ദേഹത്തിന്റെ പ്രസ്താവന വേദനിപ്പിച്ചുവെന്നും എം.സി. ജോസഫൈന്‍ പ്രതികരിച്ചു.
സിപിഎം നേതാക്കളുടെ ഗൃഹസമ്പര്‍ക്ക പരിപാടിക്കിടെയാണ് എം.സി ജോസഫൈനെതിരെ കഥാകൃത്ത് ടി. പത്മനാഭന്‍ രൂക്ഷ വിമര്‍ശനം ഉന്നയിച്ചത്. പരാതിക്കാരോട് അനുഭാവപൂര്‍വം സംസാരക്കേണ്ട ആളുകള്‍ ഇത്തരത്തില്‍ പെരുമാറുന്നത് പാര്‍ട്ടിക്ക് ദോഷം ചെയ്യുമെന്നും അദ്ദേഹം വിമര്‍ശിച്ചിരുന്നു. കുപ്രചാരണങ്ങള്‍ വഴി വനിതാ കമ്മീഷനെ അപമാനിക്കാനുള്ള ശ്രമമാണ് നടക്കുന്നതെന്നും ജോസഫൈന്‍ പറഞ്ഞു. പരാതിക്കാരിയായ വയോധികയ്ക്ക് നീതി കിട്ടുമെന്നും പരാതി കോടതിയിലാണെന്നും വനിതാ കമ്മീഷന്‍ അറിയിച്ചു.