‘യാതൊരു ബന്ധവുമില്ല’; ദീപ് സിദ്ദുവിനെ തള്ളിപ്പറഞ്ഞ് സണ്ണി ഡിയോള്‍

കര്‍ഷകരുടെ ട്രാക്ടര്‍ റാലിക്കിടെ നുഴഞ്ഞുകയറി ചെങ്കോട്ടയില്‍ കൊടിയുയര്‍ത്തിയ പഞ്ചാബി നടന്‍ ദീപ് സിദ്ദുവുമായി തനിക്കിപ്പോള്‍ യാതൊരു ബന്ധവുമില്ലെന്ന് നടനും ബിജെപി എംപിയുമായ സണ്ണി ഡിയോള്‍. ചൊവ്വാഴ്ച്ച ചെങ്കോട്ടയില്‍ അരങ്ങേറിയ സംഭവങ്ങളില്‍ താന്‍ അതീവ ദുഃഖിതനാണെന്നും അദ്ദേഹം പറഞ്ഞു. തന്റെ ട്വിറ്റര്‍ അക്കൗണ്ടിലൂടെ ആയിരുന്നു സണ്ണി ഡിയോളിന്റെ പ്രതികരണം.നടന്‍ ദീപ് സിദ്ദു റാലിക്കിടയിലേക്ക് ഇടിച്ചുകയറിയതിന് പിന്നാലെയാണ് ചെങ്കോട്ടയില്‍ അക്രമം അഴിച്ചുവിട്ടതെന്ന ആരോപണവുമായി ഹരിയാനയിലെ ഭാരതീയ കിസാന്‍ യൂണിയന്‍ നേതാവ് ഗുര്‍നാം സിംഗ് ചദാനി രംഗത്തെത്തിയിരുന്നു. മാത്രമല്ല കര്‍ഷകര്‍ ചെങ്കോട്ടയിലേക്ക് പോകുവാന്‍ തയ്യാറായിരുന്നില്ലെന്നും ദീപ് സിദ്ദുവാണ് കര്‍ഷകരെ അവിടേയ്ക്ക് കൊണ്ടുപോയതെന്നും അദ്ദേഹം ഇന്ത്യ ടുഡെയോടു പറഞ്ഞു.
സിദ്ദുവിനെതിരെ ആരോപണവുമായി സ്വരാജ് അഭിയാന്‍ നേതാവ് യോഗേന്ദ്ര യാദവും രംഗത്തെത്തിയിരുന്നു. ചെങ്കോട്ടയില്‍ അക്രമം ഉണ്ടായ വേളയില്‍ സിദ്ദു അവിടെ സന്നിഹിതനായിരുന്നുവെന്നും തങ്ങള്‍ തുടക്കം മുതലെ അയാളെ തടയാന്‍ ശ്രമിച്ചിരുന്നുവെന്നും യോഗേന്ദ്ര യാദവ് കൂട്ടിച്ചേര്‍ത്തു.ചെങ്കോട്ടയിലേക്ക് മൈക്രോഫോണുമായെത്തിയ സിദ്ദുവിനെതിരെ അന്വേഷണം വേണമെന്നും കര്‍ഷകരെ പലയിടങ്ങളിലേക്ക് പ്രകോപിപിച്ചുവിട്ട് അക്രമം അഴിച്ചുവിടാനുള്ള ശ്രമമാണ് സിദ്ദു നടത്തിയതെന്നും അദ്ദേഹം ആരോപിച്ചു. മാത്രമല്ല, സിദ്ദുവിന് ബിജെപിയുമായി ബന്ധമുണ്ടെന്നും അയാള്‍ തെരഞ്ഞെടുപ്പ് സമയത്ത് സണ്ണി ഡിയോളിന്റെ എജന്റായി പ്രവര്‍ത്തിച്ചിട്ടുണ്ടെന്നും അദ്ദേഹം പറഞ്ഞു.ഖലിസ്താനി അനുഭാവിത്വം പ്രകടിപ്പിച്ചതിനെ തുടര്‍ന്നാണ് സിദ്ദുവിനെ സമരത്തില്‍ നിന്നും പൂര്‍ണമായും ഒഴിവാക്കാന്‍ കര്‍ഷക സംഘടന നേതാക്കള്‍ തീരുമാനിച്ചത്. കര്‍ഷക സമരത്തിന്റെ ഭാഗമല്ലാത്ത ദീപു സിദ്ദ് എങ്ങനെയാണ് കിസാന് ട്രാക്ടര്‍ മാര്‍ച്ചില്‍ എത്തിയതെന്നാണ് കര്‍ഷകരടക്കം ഉന്നയിക്കുന്ന സംശയം. ചെങ്കോട്ടയില്‍ ഉണ്ടായ സംഘര്‍ഷങ്ങള്‍ക്കിടയില്‍ ദീപു സിദ്ദുവിന്റെ സാന്നിധ്യവും ഉണ്ടായിരുന്നു.
ഡല്‍ഹിയിലെ പ്രതിഷേധപ്രകടത്തിനിടെ നടന്ന അക്രമത്തില്‍ കര്‍ഷകസംഘടനകള്‍ക്ക് യാതൊരു പങ്കുമില്ലെന്ന് സംയുക്ത കിസാന്‍ മോര്‍ച്ച വ്യക്തമാക്കിയിരുന്നു. കഴിഞ്ഞ 60 ദിവസമായി സമാധാനപരമായ സമരമാണ് നടത്തി വന്നത്. എന്നാല്‍ ചില വ്യക്തികളും സംഘടനകളും സമാധാനപരമായ സമരം എന്ന ധാരണയെ അട്ടിമറിക്കാന്‍ ശ്രമിച്ചു. ചെങ്കോട്ടയില്‍ നടന്ന സമരത്തില്‍ സാമൂഹ്യവിരുദ്ധര്‍ നുഴഞ്ഞു കയറി. രാജ്യത്തിന്റെ അഭിമാനമായ ദേശീയ സ്മാരകങ്ങളിലും പ്രതീകങ്ങളിലും ഉണ്ടായ സംഘര്‍ഷങ്ങളോട് ഒരു തരത്തിലും യോജിക്കാനാവില്ല. സമരത്തിന്റെയും സംഘര്‍ഷങ്ങളുടേയും വിവരങ്ങള്‍ ശേഖരിച്ച ശേഷം വിശദമായ പ്രതികരണം പിന്നീട് നടത്തുമെന്നും കിസാന്‍ മോര്‍ച്ച പറഞ്ഞിരുന്നു.