മഹത്തായ ആശയങ്ങളുള്ള മനുഷ്യന്‍; വൈകല്യങ്ങളെ അതിജീവിച്ച് പ്രകൃതിയെ സംരക്ഷിക്കുന്ന രാജപ്പനെ അഭിനന്ദിച്ച് പ്രധാനമന്ത്രി

വള്ളം തുഴഞ്ഞു കായലിലെ പ്ലാസ്റ്റിക് കുപ്പികള്‍ പെറുക്കി മാറ്റുന്ന കോട്ടയം കുമരകം സ്വദേശി വി എസ് രാജപ്പനെ അഭിനന്ദിച്ച് പ്രധാനമന്ത്രി. മന്‍ കി ബാത് പരിപാടിയിലാണ് അഭിനന്ദനം. വൈകല്യങ്ങളെ അതിജീവിച്ച് പ്രകൃതിയെ സംരക്ഷിക്കുന്ന രാജപ്പന് പ്രധാനമന്ത്രിയുടെ വാക്കുകള്‍ നല്‍കുന്ന ആവേശം ചെറുതല്ല.ഉപജീവന മാര്‍ഗമെന്ന നിലയ്ക്ക് കൂടിയാണ് കുമരകം മഞ്ചാടിക്കര സ്വദേശി രാജപ്പന്‍ വള്ളവും തുഴഞ്ഞു കായല്‍ പരപ്പ് കീഴടക്കിയത്. ഇരുകാലുകള്‍ക്കും സ്വാധീനമില്ലെന്നത് ഇത്തരമൊരു ദൗത്യമേറ്റെടുക്കാന്‍ അയാള്‍ക്ക് ഒരു കുറവേയായിരുന്നില്ല. ഒടുവില്‍ ആ നല്ല ശ്രമങ്ങള്‍ക്ക് പ്രധാനമന്ത്രിയുടെ അഭിനന്ദനം. ശരീരം തളര്‍ന്നിട്ടും രാജപ്പന്‍ നടത്തുന്ന പ്രവര്‍ത്തനം മാതൃകാപരമാണെന്ന് പ്രധാനമന്ത്രി പറഞ്ഞു. അദ്ദേഹത്തിന്റെ ആശയങ്ങള്‍ എത്ര മഹത്തരമാണെന്ന് സങ്കല്‍പിച്ച് നോക്കൂ എന്നും പ്രധാനമന്ത്രി പറഞ്ഞു.പ്രകൃതി സൗന്ദര്യം ആസ്വദിക്കാന്‍ എത്തുന്നവര്‍ കായല്‍പ്പരപ്പില്‍ ഉപേക്ഷിക്കുന്ന പ്ലാസ്റ്റിക്ക് കുപ്പികള്‍ ഒന്നുപോലും ശേഷിക്കാതെ കരയ്ക്കടുപ്പിക്കുന്ന രാജപ്പന് സങ്കടങ്ങള്‍ ഇപ്പോഴും വിട്ടുമറിയിട്ടില്ല. ഒരു വലിയ വള്ളവും കയറിക്കിടക്കാന്‍ ഒരു വീടും വേണമെന്നതാണ് രാജപ്പന്റെ ആഗ്രഹം. പ്ലാസ്റ്റിക്ക് കുപ്പികള്‍ വിറ്റ് കിട്ടുന്ന തുച്ഛമായ തുകയാണ് രാജപ്പന്റെ ഏക വരുമാനം. കഴിഞ്ഞ ആറ് വര്‍ഷമായി ഒരു ദൗത്യമെന്നോണം പരിസ്ഥിതി സംരക്ഷണമേറ്റെടുത്ത രാജപ്പന് ഇനിയുമേറെ മുന്നോട്ട് പോകാനുണ്ട്.