ബിഷപ് ജോസഫ് നീലങ്കാവില്‍ അന്തരിച്ചു

സാഗര്‍ രൂപതയുടെ മുന്‍ ബിഷപ് മാര്‍ ജോസഫ് പാസ്റ്റര്‍ നീലങ്കാവില്‍ (91) അന്തരിച്ചു. വിരമിച്ചശേഷം 2006 മുതല്‍ തൃശൂര്‍ കുറ്റൂരിലെ സാഗര്‍ മിഷന്‍ ഹോമില്‍ വിശ്രമജീവിതം നയിക്കുകയായിരുന്നു.ഇന്നു രാവിലെ കിടക്കയില്‍ അബോധാവസ്ഥയില്‍ കണ്ട അദ്ദേഹത്തെ അമല മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും മരണം സ്ഥിരീകരിക്കുകയായിരുന്നു. സംസ്‌കാരം പിന്നീട്.
തൃശൂര്‍ അതിരൂപതയിലെ അരണാട്ടുകര ഇടവകയിലെ ലാസര്‍ നീലങ്കാവിലിന്റെയും കുഞ്ഞനം പാലത്തിങ്കലിന്റെയും മകനായി 1930 മാര്‍ച്ച് 19 നു ജനിച്ചു. 1950 ഒക്ടോബര്‍ 15 ന് അന്പഴക്കാട് സെന്റ് തെരേസാസ് ആശ്രമത്തില്‍ ചേര്‍ന്നതോടെയാണ് പേരിനൊപ്പം പാസ്റ്റര്‍ എന്ന പേരുകൂടി ചേര്‍ത്തത്.
1960 മെയ് 17 ന് ബംഗളൂരു ധര്‍മാരാം ചാപ്പലില്‍ കര്‍ദിനാള്‍ മാര്‍ ജോസഫ് പാറേക്കാട്ടില്‍നിന്ന് പൗരോഹിത്യം സ്വീകരിച്ചു. തൃശൂര്‍ രൂപതയിലെ സോഷ്യല്‍ ആക്ഷന്‍ അസിസ്റ്റന്റ് ഡയറക്ടറായിട്ടായിരുന്നു ആദ്യ നിമയനം. കാത്തലിക് ലേബര്‍ അസോസിയേഷന്റെ ഡയറക്ടറായിരുന്നു. റോമിലെ ലാറ്ററന്‍ യൂണിവേഴ്‌സിറ്റിയില്‍നിന്ന് സഭാനിയമത്തില്‍ ഡോക്ടറേറ്റ് നേടി.
1987 ഫെബ്രുവരി 22 ന് സാഗര്‍ രൂപതയുടെ രണ്ടാമത്തെ മെത്രാനായി നിയമിതനാതി. തൃശൂര്‍ രൂപത മെത്രാന്‍ മാര്‍ ജോസഫ് കുണ്ടുകുളത്തില്‍നിന്ന് മെത്രാഭിഷേകം സ്വീകരിച്ചു. 19 കൊല്ലം സാഗര്‍ രൂപതയെ നയിച്ച പിതാവ് 2006 ഫെബ്രുവരി രണ്ടിന് വിശ്രമജീവിതത്തിലേക്കു പ്രവേശിച്ചു.ഇംഗ്ലീഷ്, മലയാളം, ഹിന്ദി, ജര്‍മന്‍, ഇറ്റാലിയന്‍, ലാറ്റിന്‍ എന്നീ ഭാഷകള്‍ കൈകാര്യം ചെയ്യാന്‍ അറിയാമായിരുന്നു. സിഎംഐ സന്യാസ സമൂഹത്തിന്റെ ജനറല്‍ മിഷന്‍ കൗണ്‍സിലറായി പ്രവര്‍ത്തിച്ചിട്ടുണ്ട്.
ആത്മകഥയായ 'ദൈവമേ അങ്ങെന്നെ ഉയര്‍ത്തി' അടക്കം നിരവധി ഗ്രന്ഥങ്ങള്‍ രചിച്ചിട്ടുണ്ട്. മാര്‍ ജോസഫ് നീലങ്കാവിലിന്റെ നാലു സഹോദരിമാരില്‍ രണ്ടു പേര്‍ ഫ്രാന്‍സിസ്‌കന്‍ ക്ലാരിസ്റ്റ് സന്യാസ സമൂഹത്തിലെ സിസ്റ്റര്‍മാരാണ്.