രവി മേനോന്റെ ഇരുപതാമത്തെ പുസ്തകം ‘മധുരമായ് പാടി വിളിക്കുന്നു’ പ്രകാശനം ചെയ്തു

രവി മേനോന്റെ ഇരുപതാമത്തെ പുസ്തകം 'മധുരമായ് പാടി വിളിക്കുന്നു' പ്രകാശനം ചെയ്തു. 1970 മുതല്‍ 90 വരെയുള്ള കാലഘട്ടത്തിലെ മനോഹര ഗാനങ്ങള്‍ക്ക് പിന്നിലെ അധികമാരും അറിയാത്ത കഥകളാണ് പുസ്തകത്തിലെ പ്രതിപാദ്യ വിഷയം. ഏതോ ജന്മവീഥികളില്‍, ഹിമശൈല സൈകത, മേഘം പൂത്തു തുടങ്ങി, മൈനാകം കടലില്‍ നിന്നുയരും, ലോകം മുഴുവന്‍ സുഖം പകരാന്‍ അങ്ങനെ നിരവധി പാട്ടുകളുടെ കഥകളാണ് പുസ്തകത്തില്‍ ഉള്‍പ്പെടുത്തിയിരിക്കുന്നത്. സിനിമ പുറത്തിറങ്ങാതെ തന്നെ പാട്ടുകള്‍ ഹിറ്റായ കഥകളും ഇതില്‍ ഉള്‍പ്പെടുത്തിയിട്ടുണ്ട്. നീലക്കടമ്പ് എന്ന സിനിമയിലെ കുടജാദ്രിയില്‍ കുടികൊള്ളും, ദേവദാസിയിലെ പാദരേണു തേടിയണഞ്ഞു എന്നിവ അത്തരം പാട്ടുകളുടെ ഉദാഹരണങ്ങളാണ്. കേരള കൗമുദിയിലൂടെ തന്റെ മാധ്യമപ്രവര്‍ത്തന ജീവിതത്തിന് തുടക്കം കുറിച്ച രവി മേനോന്‍, കൗമുദി, ഇന്ത്യന്‍ എക്സ്പ്രസ് എന്നീ പത്രങ്ങളുടെ ഫുട്ബോള്‍ റിപ്പോര്‍ട്ടര്‍ ആയിരുന്നു. 2007 ല്‍ മാതൃഭൂമിയുടെ ക്ലബ് എഫ് എമ്മില്‍ ചേര്‍ന്നതോടെ സംഗീതമായി തട്ടകം. ഇപ്പോള്‍ മാതൃഭൂമിയുടെ മ്യൂസിക് റീസേര്‍ച്ച് ഹെഡായി പ്രവര്‍ത്തിക്കുകയാണ്. മലപ്പുറം ജില്ലയിലെ എടരിക്കോട് സ്വദേശിയായ രവി മേനോന്‍ തിരുവനന്തപുരത്ത് താമസം.