വയോജന ദമ്പതിമാരെ വീടിനുള്ളില്‍ മരിച്ച നിലയില്‍ കണ്ടെത്തി; ഭാര്യയെ കൊലപ്പെടുത്തിയ ശേഷം ഭര്‍ത്താവ് തൂങ്ങി മരിച്ചതെന്നു സൂചന

കോട്ടയം: കുറിച്ചി കേളന്‍കവലയില്‍ വയോജന ദമ്പതിമാരെ വീടിനുള്ളില്‍ മരിച്ച നിലയില്‍ കണ്ടെത്തി. ഭാര്യയെ ഹാളിനുള്ളിലും ഭര്‍ത്താവിനെ അടുക്കളയില്‍ തൂങ്ങി മരിച്ച നിലയിലുമാണ് കണ്ടെത്തിയിരിക്കുന്നത്. ലോട്ടറിക്കച്ചവടക്കാരനായ കുറിച്ചി കേളന്‍കവല കാഞ്ഞിരക്കാട്ട് വീട്ടില്‍ ഗോപി (80) കുഞ്ഞമ്മ (78) എന്നിവരെയാണ് ഇന്നു രാവിലെ വീടിനുള്ളില്‍ മരിച്ച നിലയില്‍ കണ്ടെത്തിയത്. ഇരുവരും തമ്മില്‍ സാധാരണ വീടിനുള്ളില്‍ വഴക്കുണ്ടാകുന്നത് പതിവായിരുന്നതായി പൊലീസ് പറയുന്നു. കഴിഞ്ഞ ദിവസവും സമാന രീതിയില്‍ വഴക്കുണ്ടായിരുന്നു. ചൊവ്വാഴ്ച രാവിലെ ഇരുവരെയും കാണുന്നതിനായി കുഞ്ഞമ്മയുടെ സഹോദരന്‍ വീട്ടിലെത്തിയിരുന്നു. ഈ സമയത്താണ് കുഞ്ഞമ്മയെ കട്ടിലില്‍ മരിച്ച നിലയില്‍ കണ്ടെത്തിയത്. തുടര്‍ന്നു, ഇയാള്‍ വീടിനുള്ളില്‍ കയറി നോക്കിയപ്പോഴാണ് അടുക്കളയില്‍ ഗോപിയെയും മരിച്ചനിലയില്‍ കണ്ടെത്തിയത്. സഹോദരന്‍ നിലവിളിച്ചുകൊണ്ട് പുറത്തേയ്ക്ക് ഓടിരക്ഷപെട്ടു. പിന്നീട്, ഇദ്ദേഹത്തെ കണ്ടെത്തിയിട്ടില്ല. നിലവിളി കേട്ട് ഓടിയെത്തിയ നാട്ടുകാരാണ് വിവരം ചിങ്ങവനം പൊലീസില്‍ അറിയിച്ചത്. തുടര്‍ന്നു, ചിങ്ങവനം സ്റ്റേഷന്‍ ഹൗസ് ഓഫിസര്‍ ഇന്‍സ്പെക്ടര്‍ ടി.ആര്‍ ജിജുവിന്റെ നേതൃത്വത്തില്‍ പൊലീസ് സംഘം സ്ഥലത്ത് എത്തി. തുടര്‍ന്നു ഇന്‍ക്വസ്റ്റ് അടക്കമുള്ള നടപടികള്‍ ആരംഭിച്ചിട്ടുണ്ട്. മൃതദേഹം പൊലീസ് നടപടികള്‍ പൂര്‍ത്തിയാക്കിയ ശേഷം മെഡിക്കല്‍ കോളേജ് ആശുപത്രി മോര്‍ച്ചറിയിലേയ്ക്കു മാറ്റും.