സംസ്ഥാനത്ത് 175 മദ്യശാലകള്‍ കൂടി പരിഗണയിലെന്ന് സര്‍ക്കാര്‍; സമീപവാസികള്‍ക്ക് ശല്യമാകരുതെന്ന് ഹൈക്കോടതി

സംസ്ഥാനത്ത് 175 മദ്യശാലകള്‍ കൂടി തുടങ്ങുമെന്ന് സംസ്ഥാന സര്‍ക്കാര്‍. ബെവ്കോയുടെ ശുപാര്‍ശ എക്സൈസ് വകുപ്പിന്റെ പരിഗണനയിലെന്ന് സര്‍ക്കാര്‍ ഹൈക്കോടതിയില്‍ അറിയിച്ചു. ഹൈക്കോടതി നിര്‍ദേശിച്ച വാക് ഇന്‍ മദ്യവില്‍പനശാലകള്‍ ഉള്‍പ്പെടെ പരിഗണയിലുണ്ടെന്നും സര്‍ക്കാര്‍ ചൂണ്ടിക്കാട്ടി. അതേസമയം, മദ്യക്കടകള്‍ സമീപ വാസികള്‍ക്ക് ദുരിതം സൃഷ്ടിക്കുന്ന നില ഉണ്ടാവരുത് എന്ന് ഹൈക്കോടതി നിര്‍ദേശിച്ചു. ബെവ്കോയുടെ മദ്യ വില്‍പനശാലയുടെ സാഹചര്യങ്ങള്‍ സംബന്ധിച്ച കേസ് പരിഗണിക്കവെ ആയിരുന്നു സര്‍ക്കാര്‍ പുതിയ മദ്യശാലകള്‍ പരിഗണിക്കുന്നു എന്ന് വ്യക്തമാക്കിയത്. ഈ ശുപാര്‍ശയില്‍ വൈകാതെ തീരുമാനം എടുക്കുമെന്നും സര്‍ക്കാര്‍ അറിയിച്ചു. വൃത്തിഹീനമായി പ്രവര്‍ത്തിക്കുന്ന ബെവ്കോയുടെ മദ്യ ശാലകള്‍ മാറ്റി സ്ഥാപിക്കണമെന്ന് നേരത്തെ ഹൈക്കോടതി നിര്‍ദേശിച്ചിരുന്നു. മദ്യം വാങ്ങാനെത്തുന്നവര്‍ക്ക് മതിയായ സൗകര്യങ്ങള്‍ ഒരുക്കണം എന്നും ഹൈക്കോടതി വ്യക്തമാക്കിയിരുന്നു. തിരക്ക് ഒഴിവാക്കാന്‍ എന്ത് കൊണ്ട് കൂടുതല്‍ മദ്യശാലകള്‍ തുടങ്ങിക്കൂടാ എന്ന ചോദ്യവും ഹൈക്കോടതി ചോദിച്ചിരുന്നു. ഈ സാചര്യത്തിലാണ് പുതിയ മദ്യക്കടകള്‍ പരിഗണിക്കുന്നു എന്ന് സര്‍ക്കാര്‍ അറിയിച്ചിരിക്കുന്നത്. കേസ് രണ്ടാഴ്ചക്ക് ശേഷം വീണ്ടും പരിഗണിക്കും.