‘നിലത്തിട്ട് വലിച്ചിഴയ്ക്കും’; ഒമ്പതു വയസുകാരന് പിതാവിന്റെ ക്രൂരമര്‍ദ്ദനം, പരാതിയുമായി നാട്ടുകാര്‍

കൊല്ലം കുളത്തൂപ്പുഴയില്‍ ഒമ്പതു വയസുകാരന് പിതാവിന്റെ ക്രൂരമര്‍ദനം. മര്‍ദ്ദനം പതിവായതോടെ പിതാവ് ബൈജുവിനെതിരെ നാട്ടുകാര്‍ പൊലീസില്‍ പരാതി നല്‍കി. വലിയ മരക്കഷണങ്ങള്‍ ഉപയോഗിച്ചാണ് കുട്ടിയെ ഉപദ്രവിക്കുന്നതെന്ന് നാട്ടുകാര്‍ ആരോപിച്ചു. പിതാവ് തന്നെ പതിവായി മര്‍ദ്ദിക്കാറുണ്ടെന്ന് കുട്ടി വ്യക്തമാക്കി. മരക്കഷണങ്ങളും, ഗ്യാസ് സിലിണ്ടറില്‍ ഉപയോഗിക്കുന്ന ട്യൂബും ഉപയോഗിച്ചാണ് മര്‍ദിക്കുന്നത്. എന്നും ഉപദ്രവിക്കാറുണ്ട്. പലപ്പോഴും നിലത്തിട്ട് വലിച്ചിഴയ്ക്കുമെന്നും ഒമ്പത് വയസ്സുകാരന്‍ പറഞ്ഞു. കൂട്ടിയുടെ ശരീരത്തില്‍ മര്‍ദ്ദനമേറ്റ പാടുകളുണ്ടെന്ന് നാട്ടുകാര്‍ പറഞ്ഞു. നിരന്തരമായി വീട്ടില്‍ നിന്നും കരച്ചില്‍ കേട്ടതോടെയാണ് നാട്ടുകാര്‍ പരാതിയുമായി പൊലീസിനെ സമീപിച്ചത്. കുളത്തൂപ്പുഴ റോക്ക് വുഡ് കടവ് പുറമ്പോക്കിലാണ് ബൈജു രണ്ടു മക്കളുമായി താമസിക്കുന്നത്. ബൈജു പതിവായി ലഹരി ഉപയോഗിക്കാറുണ്ടെന്നും നാട്ടുകാര്‍ പരാതിയില്‍ ചൂണ്ടിക്കാട്ടി. പൊലീസ് കസ്റ്റഡിയിലുള്ള ബൈജുവിനെ ചോദ്യം ചെയ്തുവരുകയാണ്.