വാഹനാപകടത്തില്‍ മുന്‍ മിസ് കേരള ഉള്‍പ്പെടെ 3 പേര്‍ മരിച്ച കേസ്;ഹാര്‍ഡ് ഡിസ്‌ക് കണ്ടെത്താനായില്ല

വാഹനാപകടത്തില്‍ മുന്‍ മിസ് കേരള ഉള്‍പ്പെടെ 3 പേര്‍ മരിച്ച കേസുമായി ബന്ധപ്പെട്ട ഹാര്‍ഡ് ഡിസ്‌ക് പൊലീസിന് കണ്ടെത്താനായില്ല. മുന്‍ മിസ് കേരള അന്‍സി കബീറും സുഹൃത്തുക്കളും പങ്കെടുത്ത ,ഫോര്‍ട്ട് കൊച്ചിയിലെ നമ്പര്‍ 18 ഹോട്ടലിലെ ഡി ജെ പാര്‍ട്ടിയുടെ ദൃശ്യങ്ങള്‍ പൊലീസ് പരിശോധനയില്‍ ലഭ്യമായില്ല. ദൃശ്യങ്ങള്‍ കണ്ടെത്താനുള്ള ശ്രമം തുടരുമെന്ന് പൊലീസ് അറിയിച്ചു. തുടര്‍നടപടി ആലോചിച്ച് തീരുമാനിക്കാനാണ് നീക്കം.ഇന്നലെ പിടിച്ചെടുത്ത ഹാര്‍ഡ് ഡിസ്‌കില്‍ ദൃശ്യങ്ങള്‍ ഉണ്ടായിരുന്നില്ല. നമ്പര്‍ 18 ഹോട്ടലില്‍ ഇന്ന് ഉച്ചയോടെയാണ് പൊലീസ് വീണ്ടും പരിശോധന നടത്തിയത്. ഇന്നലെയും ഹോട്ടലില്‍ പരിശോധന നടത്തിയെങ്കിലും ഡിജെ പാര്‍ട്ടിയുടെ ദൃശ്യം കണ്ടെത്താനായിരുന്നില്ല. അപകടം നടന്നതിന്റെ പിറ്റേന്ന് ഹാര്‍ഡ് ഡിസ്‌ക്ക് ഹോട്ടലുകാര്‍ മാറ്റിയെന്നാണ് സംശയം. പൊലീസിന് കൈമാറിയ ഡിവിആറില്‍ പാര്‍ട്ടി ഹാളിലെ ദൃശ്യങ്ങളില്ല. ഇതോടെയാണ് ഹാര്‍ഡ് ഡിസ്‌ക്കിനായി വീണ്ടും പരിശോധന നടത്തിയത്. ഇന്നലെ ഹാര്‍ഡ് ഡിസ്‌ക്കിന്റെ പാസ് വേഡ് അറിയില്ലെന്നായിരുന്നു ജീവനക്കാര്‍ പറഞ്ഞത്.