മോന്‍സന്‍ കേസ്: അന്വേഷണ പുരോഗതി റിപ്പോര്‍ട്ട് ഹൈക്കോടതിക്ക് കൈമാറി

പുരാവസ്തു തട്ടിപ്പ് കേസ് പ്രതി മോന്‍സന്‍ മാവുങ്കലിന് എതിരായ അന്വേഷണ പുരോഗതി റിപ്പോര്‍ട്ട് ഹൈക്കോടതിയില്‍ സമര്‍പ്പിച്ചു. മുദ്രവച്ച കവറില്‍ ആണ് റിപ്പോര്‍ട്ട് നല്‍കിയത്. മോന്‍സനെതിരെ അന്വേഷണം ആവശ്യപ്പെട്ട് മുന്‍ ഡിജിപി ലോകനാഥ് ബെഹ്‌റ എഴുതിയ കത്തും, പുരാവസ്തു മ്യൂസിയത്തിന്റെ പ്രവര്‍ത്തനത്തില്‍ സംശയം പ്രകടിപ്പിച്ചു ഡിജിപി മനോജ് എബ്രഹാം എഴുതിയ നോട്ട് ഫയലും കോടതിയില്‍ ഹാജരാക്കി. കേസ് ഹൈക്കോടതി ഇന്ന് പരിഗണിക്കും. അതേസമയം, മോന്‍സനുമായി അവിശുദ്ധ ബന്ധം പുലര്‍ത്തി തട്ടിപ്പിനു കൂട്ടുനിന്ന ഐജി ഗോഗുലത്ത് ലക്ഷ്മണിനെ സര്‍ക്കാര്‍ കഴിഞ്ഞ ദിവസം സസ്‌പെന്‍ഡ് ചെയ്തിരുന്നു. തട്ടിപ്പു കേസിലടക്കം ഇദ്ദേഹത്തെ പ്രതിയാക്കുന്നതിന്റെ വിശദാംശം ക്രൈംബ്രാഞ്ച് പരിശോധിക്കുകയാണ്. 1997 ബാച്ച് ഐപിഎസ് ഉദ്യോഗസ്ഥനായ ലക്ഷ്മണ്‍, നിലവില്‍ സോഷ്യല്‍ പൊലീസിങ്, ട്രാഫിക് ചുമതലയുള്ള ഐജിയാണ്. ജനുവരിയില്‍ എഡിജിപി റാങ്കില്‍ എത്തേണ്ട ഇദ്ദേഹം 2033 വരെ സര്‍വീസുള്ള ഉദ്യോഗസ്ഥനാണ്. ക്രൈംബ്രാഞ്ച് മേധാവി എസ്.ശ്രീജിത്തിന്റെ റിപ്പോര്‍ട്ടിന്റെ അടിസ്ഥാനത്തിലാണു ചീഫ് സെക്രട്ടറി വി.പി.ജോയ് സസ്‌പെന്‍ഡ് ചെയ്തത്. തലസ്ഥാനത്തെ പൊലീസ് ക്ലബ്ബില്‍ താമസിക്കുന്ന ലക്ഷ്മണ്‍, സുഹൃത്തായ ആന്ധ്ര സ്വദേശിനിയെ അവിടെ വരുത്തി മോന്‍സന്റെ തട്ടിപ്പുസാധനങ്ങള്‍ വില്‍ക്കാന്‍ ശ്രമിച്ചെന്ന വിവരവും ക്രൈംബ്രാഞ്ചിനു ലഭിച്ചിരുന്നു.