വിവാഹം 40 വര്‍ഷം മുമ്പ്, അന്ന് പ്രായപൂര്‍ത്തിയായിരുന്നില്ലെന്ന് സോഫ്റ്റ് വെയര്‍; ഹൈക്കോടതിയില്‍ ഹര്‍ജി

40 വര്‍ഷം മുമ്പ് വിവാഹം കഴിഞ്ഞ ദമ്പതികളുടെ വിവാഹ സര്‍ട്ടിഫിക്കറ്റുമായി ബന്ധപ്പെട്ട് ഡല്‍ഹി സര്‍ക്കാരിന് നോട്ടീസ് നല്‍കി ഡല്‍ഹി ഹൈക്കോടതി. തങ്ങളുടെ വിവാഹം രജിസ്റ്റര്‍ ചെയ്യാന്‍ സാധിക്കുന്നില്ലെന്ന് ചൂണ്ടിക്കാട്ടി ദമ്പതികള്‍ നല്‍കിയ ഹര്‍ജിയിലാണ് ഡല്‍ഹി ഹൈക്കോടതി സര്‍ക്കാരിന് നോട്ടീസ് നല്‍കിയത്. ഇരുവരും വിവാഹിതരാകുമ്പോള്‍ പ്രായപൂര്‍ത്തി ആയിരുന്നില്ലെന്ന സാങ്കേതിക തടസം ചൂണ്ടിക്കാട്ടിയാണ് രജിസ്‌ട്രേഷന്‍ തടസ്സപ്പെട്ടത്. 1981-ലാണ് ഇരുവരും വിവാഹിതരായത്. വിവാഹ സമയത്ത് ഭര്‍ത്താവിന് 21 വയസ്സും ഭാര്യയ്ക്ക് 18 വയസ്സും തികഞ്ഞിരുന്നില്ലെന്നാണ് വിവാഹം രജിസ്റ്റര്‍ ചെയ്യേണ്ട സോഫ്റ്റ് വെയര്‍ കണ്ടെത്തിയത്. സോഫ്‌റ്റ്വെയറില്‍ വിവാഹം രജിസ്റ്റര്‍ ചെയ്യാന്‍ സാധിക്കുന്നില്ലെന്ന് ചൂണ്ടിക്കാട്ടിയാണ് ദമ്പതികള്‍ ഡല്‍ഹി ഹൈക്കോടതിയെ സമീപിച്ചത്. തുടര്‍ന്നാണ് സര്‍ക്കാരിനോട് ഹര്‍ജിയുമായി ബന്ധപ്പെട്ട മറുപടി നല്‍കാന്‍ ജസ്റ്റിസ് രേഖ പിള്ള ആവശ്യപ്പെട്ടിരിക്കുന്നത്.