ഇന്ധനവില കുറച്ചു, 3 കൃഷി നിയമങ്ങള്‍ റദ്ദാക്കും; പിന്മാറ്റം 7 വര്‍ഷത്തിനിടെ ആദ്യം

ഏഴു വര്‍ഷത്തോളം നീളുന്ന നരേന്ദ്ര മോദി ഭരണത്തില്‍ പ്രതിഷേധത്തെ തുടര്‍ന്ന് കേന്ദ്രസര്‍ക്കാര്‍ പൂര്‍ണമായും പിന്മാറുന്ന ആദ്യ സംഭവമാണ് മൂന്നു കൃഷി നിയമങ്ങള്‍ പിന്‍വലിക്കാനുള്ള തീരുമാനം. വിവാദമായ കൃഷി നിയമങ്ങള്‍ പിന്‍വലിക്കാതെ പിന്നോട്ടുപോകില്ലെന്ന് കര്‍ഷകര്‍ ഉറപ്പിച്ച് പറഞ്ഞതോടെയാണ് കേന്ദ്രത്തിന്റെ മനംമാറ്റം. അഞ്ച് സംസ്ഥാനങ്ങളിലേക്കു നടക്കാനിരിക്കുന്ന തിരഞ്ഞെടുപ്പും കേന്ദ്രത്തെ ഇത്തരത്തിലൊരു തീരുമാനത്തിലെത്തിച്ചു എന്നാണ് വിലയിരുത്തല്‍. ഉപതിരഞ്ഞെടുപ്പില്‍ തിരിച്ചടിയുടെ സൂചനയും ബിജെപിക്ക് ലഭിച്ചിരുന്നു. ഉത്തര്‍പ്രദേശില്‍ അടക്കം നൂറ് സീറ്റിന്റെ കുറവാണ് ബിജെപിക്ക് സര്‍വേകള്‍ പ്രവചിച്ചത്. ഇതോടെയാണ് ഇന്ധനവില കുറച്ചതിന് പിന്നാലെ കാര്‍ഷിക നിയമങ്ങളും പിന്‍വലിച്ചത്. അടുത്ത വര്‍ഷം നിയമസഭാ തിരഞ്ഞെടുപ്പ് നടക്കുന്ന പഞ്ചാബില്‍ ബിജെപിക്ക് ഇത് നേട്ടമാകുമോ എന്ന ചോദ്യവും ഉയര്‍ന്നിട്ടുണ്ട്.