1.64 കോടി രൂപയുടെ സാധനങ്ങളുമായി കടന്നു; ആമസോണ്‍ ട്രക്ക് ഡ്രൈവറും മൂന്ന് കൂട്ടാളികളും പിടിയില്‍

1.64 കോടി രൂപയുടെ സാധനങ്ങളും കൊണ്ട് കടന്ന ട്രക്ക് ഡ്രൈവറും മൂന്ന് കൂട്ടാളികളും പിടിയില്‍. പ്രമുഖ ഇ-കൊമേഴ്‌സ് സ്ഥാപനമായ ആമസോണിനു ലോജിസ്റ്റിക്‌സ് പിന്തുണ നല്‍കുന്ന ഒരു സ്ഥാപനത്തിലെ ട്രക്ക് ഡ്രൈവറായ ബദറുല്‍ ഹഖ് അഥവാ വാസി അജയ് ആണ് കര്‍ണാടക കോളാര്‍ പൊലീസിന്റെ പിടിയിലായത്. അസം സ്വദേശിയായ ഇയാള്‍ക്കൊപ്പം അഭിനന്ദ്, അബ്ദുല്‍ ഹുസൈന്‍, പ്രദീപ് എന്നിവരും പിടിയിലായി. അഭിനന്ദും അബ്ദുല്‍ ഹുസൈനും അസം സ്വദേശികളും പ്രദീപ് ബെംഗളൂരു സ്വദേശിയുമാണ്. ജോലി അന്വേഷിച്ചാണ് അസം സ്വദേശികള്‍ കര്‍ണാടകയിലെത്തിയത്. സാധനങ്ങള്‍ പങ്കുവെക്കാനായിരുന്നു അവരുടെ പദ്ധതി. എന്നാല്‍, അതിനു മുന്‍പ് പിടിക്കപ്പെട്ടു. തട്ടിക്കൊണ്ടുപോകാന്‍ ശ്രമിച്ച സാധനങ്ങളൊക്കെ കണ്ടെടുത്തു എന്നും കൂടുതല്‍ അന്വേഷണം നടക്കുകയാണെന്നും പൊലീസ് അറിയിച്ചു. ഒക്ടോബര്‍ 30നാണ് ട്രക്കും സാധനങ്ങളുമായി ഇവര്‍ കടന്നത്. തുടര്‍ന്ന് ലോജിസ്റ്റിക്‌സ് മാനേജര്‍ സുധാകറില്‍ നിന്ന് പരാതി ലഭിച്ച പൊലീസ് അന്വേഷണം ആരംഭിച്ചു. മൊബൈല്‍ ഫോണ്‍, കോസ്‌മെറ്റിക്‌സ്, ലാപ്‌ടോപ്പ് തുടങ്ങി 4027 സാധനങ്ങളാണ് വണ്ടിയില്‍ ഉണ്ടായിരുന്നത്. ഒക്ടോബര്‍ 30 പുലര്‍ച്ചെ 3.15ന് ബുഡിഗെരെയിലെ ആമസോണ്‍ കേന്ദ്രത്തില്‍ നിന്ന് പുറപ്പെട്ട ട്രക്കിന്റെ ലക്ഷ്യസ്ഥാനം അനുഗൊണ്ടനഹള്ളിയിലെ ആമസോണ്‍ കേന്ദ്രമായിരുന്നു. 15 കിലോമീറ്റര്‍ ദൂരം മാത്രമാണ് ഈ സ്ഥലങ്ങള്‍ തമ്മില്‍ ഉണ്ടായിരുന്നത്. അഞ്ച് മണിയോടെ വാഹനം തെറ്റായ ദിശയിലാണ് സഞ്ചരിക്കുന്നതെന്ന് ലോജിസ്റ്റിക്‌സ് കേന്ദ്രത്തിലെ ജോലിക്കാര്‍ മനസ്സിലാക്കി. തട്ടിക്കൊണ്ടുപോയവര്‍ വാഹനത്തിലെ ജിപിഎസ് ഓഫ് ചെയ്തതിനു പിന്നാലെ ഇവര്‍ വാഹനത്തിനായി തെരച്ചില്‍ നടത്തുകയും 145 കിലോമീറ്റര്‍ അകലെ നഗലപുരയില്‍ വാഹനം ഉപേക്ഷിച്ച നിലയില്‍ കണ്ടെത്തുകയും ചെയ്തു. തുടര്‍ന്ന് നടത്തിയ പരിശോധനയില്‍ സാധനങ്ങള്‍ കാണാനില്ലെന്ന് മനസ്സിലാക്കിയ അവര്‍ പൊലീസില്‍ പരാതിപ്പെടുകയായിരുന്നു.