ഭിന്നശേഷിക്കാരെ വിവാഹം കഴിച്ച് പണം തട്ടല്‍; സഹോദരിമാര്‍ക്ക് തടവും പിഴയും

ഭിന്നശേഷിക്കാരെ വിവാഹം കഴിച്ച് പണം തട്ടിയ കേസില്‍ ഇന്‍ഡോര്‍ സ്വദേശികളായ യുവതികള്‍ക്ക് മൂന്ന് വര്‍ഷം കഠിന തടവും 9.5 ലക്ഷം രൂപ പിഴയും വിധിച്ച് എറണാകുളം മജിസ്‌ട്രേറ്റ് കോടതി. മേഘ ഭാര്‍ഗവ, സഹോദരിയായ പ്രചി ശര്‍മ്മ ഭാര്‍ഗവ എന്നിവര്‍ക്കാണ് ശിക്ഷ വിധിച്ചത്. ഭിന്നശേഷിക്കാരായവരെ വിവാഹം കഴിക്കുകയും ഇവരില്‍ നിന്ന് പണവും സ്വര്‍ണവും തട്ടി മുങ്ങുകയുമായിരുന്നു ഇവര്‍ തട്ടിയെടുത്ത സ്വര്‍ണവും പണവും പരാതിക്കാരന് തിരിച്ച് നല്‍കാനും കോടതി ഉത്തരവിട്ടു. മലയാളികളായ നാല് പേര്‍ ഉള്‍പ്പെടെ 11 പേരാണ് ഇവരുടെ തട്ടിപ്പിനിരയായത്. ഇതേ കേസില്‍ തന്നെ മറ്റ് രണ്ട് പ്രതികള്‍ ഉണ്ടായിരുന്നെങ്കിലും ഇവരെ തെളിവിന്റെ അഭാവത്തില്‍ വിട്ടയച്ചു. വൈറ്റിലയില്‍ താമസമാക്കിയ സംസാര ശേഷി പ്രശ്‌നമുളള വ്യക്തി നല്‍കിയ പരാതിയിലെടുത്ത കേസ് കോടതിയിലെത്തിയത്. മകന്‍ വിവാഹതട്ടിപ്പിനരയായെന്ന് അറിഞ്ഞ വിഷമത്തില്‍ പരാതിക്കാരന്റെ പിതാവ് ഹൃദയാഘാതം വന്ന് മരണപ്പെട്ടിരുന്നു. 2015 സെപ്റ്റംബറിലാണ് വൈറ്റില സ്വദേശിയെ മേഘ വിവാഹം ചെയ്തത്. മേഘയുടെ വീട്ടുകാരായിരുന്നു വിവാഹാലോചന നടത്തിയത്. വിവാഹം കഴിഞ്ഞ് രണ്ട് ദിവസം വൈറ്റിലയില്‍ ഭര്‍ത്താവിന്റെ വീട്ടില്‍ താമസിച്ച ശേഷം 9.5 ലക്ഷം ആഭരണങ്ങളും വസ്ത്രങ്ങളുമായി ഇവര്‍ ഇന്‍ഡോറിലേക്ക് പോയി. തിരിച്ചു വരാഞ്ഞതോടെ നല്‍കിയ പരാതിയില്‍ പൊലാസ് അന്വേഷണം നടത്തി. യുവതികളുടെ സ്ഥിരം തട്ടിപ്പാണിതെന്ന് അന്വേഷണത്തില്‍ മനസ്സിലായി. സമ്പന്ന കുടുംബങ്ങളിലെ അംഗപരിമിതരായ യുവാക്കലെ ലക്ഷ്യം വെച്ചായിരുന്നു തട്ടിപ്പുകള്‍. നേരത്തെയും സമാനമായ കേസുകള്‍ ഇവര്‍ക്കെതിരെ വന്നിട്ടുണ്ട്. എന്നാല്‍ പലരും നാണക്കേട് ഭയന്ന് സംഭവം പുറത്തു പറഞ്ഞിരുന്നില്ല.