സൈനിക വിധവകള്‍ക്കും മക്കള്‍ക്കുമായി ജീവിതം; നോവായി മധുലിക റാവത്തും

സംയുക്ത സേനാ മേധാവിയുടെ അകാലവിയോഗത്തില്‍ ഞെട്ടിയിരിക്കുകയാണ് രാജ്യം. ബുധനാഴ്ച തമിഴ്‌നാട്ടിലെ ഊട്ടിക്കു സമീപം കുനൂരില്‍ സൈനിക ഹെലികോപ്റ്റര്‍ തകര്‍ന്നാണ് ബിപിന്‍ റാവത്തും ഭാര്യ മധുലിക റാവത്തും ഉള്‍പ്പെടെ 13 പേര്‍ മരിച്ചത്. രാജ്യത്തിന് കാവലായാണ് ബിപിന്‍ റാവത്ത് സേവനമനുഷ്ഠിച്ചതെങ്കില്‍ ഭാര്യ മധുലികയുടെ സേവനം സാമൂഹിക പ്രവര്‍ത്തനങ്ങളിലൂടെയായിരുന്നു. ആര്‍മി വൈഫ്‌സ് വെല്‍ഫെയര്‍ അസോസിയേഷന്റെ പ്രസിഡന്റായിരുന്നു മധുലിക. സൈനികരുടെ ഭാര്യമാരുടെയും കുട്ടികളുടെയും ആശ്രിതരുടെയും ക്ഷേമത്തിനായായിരുന്നു മധുലികയുടെ പ്രവര്‍ത്തനം. ഇന്ത്യയിലെ ഏറ്റവും വലിയ എന്‍ജിഒകളില്‍ ഒന്നാണ് ഇത്. സൈനിക വിധവകളെയും ഭിന്നശേഷിയുള്ള കുട്ടികളെയും സഹായിക്കുന്ന നിരവധി ക്ഷേമ പരിപാടികളുടെയും ക്യാംപെയ്നുകളുടെയും ഭാഗമായി മധുലിക റാവത്ത് പ്രവര്‍ത്തിച്ചിരുന്നു. സൈനികരുടെ ഭാര്യമാരെ ശാക്തീകരിക്കുന്നതിലും തയ്യല്‍, ബാഗ് നിര്‍മാണം തുടങ്ങിയ സ്വയം തൊഴിലുകള്‍ക്കായി അവരെ പ്രോത്സാഹിപ്പിക്കുന്നതിലും അവര്‍ നിറഞ്ഞു നിന്നു. അംഗങ്ങളുടെ ആരോഗ്യവും ക്ഷേമവും മധുലിക ശ്രദ്ധാപൂര്‍വം നോക്കി. പ്രവര്‍ത്തനങ്ങളിലൂടെ ആയിരക്കണക്കിനുപേരുടെ കരുത്തായിരുന്നു അവര്‍. ഡല്‍ഹി സര്‍വകലാശാലയില്‍നിന്ന് മനഃശാസ്ത്രത്തില്‍ ബിരുദം നേടിയ മധുലിക, ക്യാന്‍സര്‍ ബാധിതരുടെ ക്ഷേമത്തിനായും പ്രവര്‍ത്തിച്ചിരുന്നു.