കത്രിനയും വിക്കി കൗശലും വിവാഹിതരായി

ബോളിവുഡ് താരങ്ങളായ വിക്കി കൗശലും കത്രീന കൈഫും വിവാഹിതരായി. ജയ്പൂരില്‍വച്ച് നടന്ന ചടങ്ങില്‍ കുടുംബാംഗങ്ങള്‍ മാത്രമായിരുന്നു സന്നിഹിതരായത്. രാജസ്ഥാനിലെ ഫോര്‍ട്ട് ബര്‍വാരയിലെ സിക്‌സ് സെന്‍സസ് റിസോര്‍ട്ടില്‍ വച്ചായിരുന്നു ഇരുവരുടെയും വിവാഹം. മെഹന്ദിക്കും സംഗീതത്തിനും ശേഷമായിരുന്നു വിവാഹച്ചടങ്ങ്. വിവാഹ ചിത്രങ്ങളും വീഡിയോകളും പകര്‍ത്തുന്നതിനായി ആമസോണ്‍ പ്രൈം നൂറ് കോടി താരങ്ങള്‍ക്ക് ഓഫര്‍ ചെയ്തുവെന്ന തരത്തില്‍ റിപ്പോര്‍ട്ടുകളുണ്ട്. സംവിധായകന്‍ കരണ്‍ ജോഹര്‍ അവതാരകനാവുന്ന കോഫി വിത്ത് കരണ്‍ എന്ന അഭിമുഖ പരിപാടിയില്‍ വിക്കി കൗശലിനൊപ്പം അഭിനയിക്കാനുള്ള ആഗ്രഹം കത്രീന പങ്കുവച്ചതോടെയാണ് ഇരുവര്‍ക്കുമിടയിലെ 'അടുപ്പം' സോഷ്യല്‍ മീഡിയയും പിന്നീട് മാധ്യമങ്ങളും ശ്രദ്ധിക്കുന്നത്. പിന്നീട് ഇരുവരും ഒന്നിച്ചുളള ചിത്രങ്ങള്‍ സോഷ്യല്‍ മീഡിയയില്‍ വൈറലുമായിരുന്നു. ഷുജിത് സിര്‍കാര്‍ സംവിധാനം ചെയ്ത സര്‍ദാര്‍ ഉദ്ദം ആണ് വിക്കിയുടെ അടുത്തിടെ പുറത്തിറങ്ങിയ ചിത്രം. ജാലിയന്‍വാലാബാഗ് കൂട്ടക്കൊലയ്ക്കുള്ള പ്രതികാരമായി മൈക്കിള്‍ ഒഡ്വയറെ ലണ്ടനില്‍ വച്ച് കൊലപ്പെടുത്തിയ ഇന്ത്യന്‍ വിപ്ലവകാരിയാണ് സര്‍ദാര്‍ ഉദ്ധം സിങ്ങ്. ഇദ്ദേഹത്തിന്റെ ജീവിതകഥയാണ് സര്‍ദാര്‍ ഉദ്ദത്തില്‍ പറയുന്നത്. ടൈഗര്‍ 3, ഫോണ്‍ഭൂത് എന്നിവയാണ് കത്രീന കൈഫിന്റെ അണിയറയിലുള്ള ചിത്രങ്ങള്‍.