സര്‍ക്കാര്‍ ആനുകൂല്യത്തിനായി സഹോദരിയെ വിവാഹം കഴിച്ചു: യുവാവ് പെട്ടു

സര്‍ക്കാര്‍ ആനുകൂല്യത്തിനായി സ്വന്തം സഹോദരിയെ വിവാഹം ചെയ്ത് യുവാവ്. ഉത്തര്‍പ്രദേശിലെ ഫിറോസാബാദിലാണു സംഭവം. മുഖ്യമന്ത്രിയുടെ 'സാമൂഹിക് വിവാഹ യോജന പദ്ധതി'യുടെ ആനുകൂല്യം ലഭിക്കാന്‍ സാമൂഹ്യ ക്ഷേമവകുപ്പ് നടത്തിയ സമൂഹ വിവാഹത്തിലാണ് ഇരുവരും വിവാഹിതരായത്.ശനിയാഴ്ച തുണ്ഡ്ല ബ്ലോക്ക് ഡെവലപ്മെന്റ് ഓഫിസില്‍ വച്ചായിരുന്നു വിവാഹം. നവദമ്പതികള്‍ സഹോദരിയും സഹോദരനുമാണെന്നു നാട്ടുകാര്‍ തിരിച്ചറിഞ്ഞതോടെയാണു സംഭവം പുറത്തറിയുന്നത്. ഇവര്‍ക്കൊപ്പം മറ്റു 51 ദമ്പതികളും വിവാഹിതരായിരുന്നു. ഇരുവര്‍ക്കുമെതിരെ നടപടിയെടുക്കുമെന്ന് തുണ്ഡ്ല ബ്ലോക്ക് ഡെവലപ്മെന്റ് ഓഫിസര്‍ നരേഷ് കുമാര്‍ പറഞ്ഞു. 'സാമൂഹിക് വിവാഹ യോജന പദ്ധതി' പ്രകാരം, വിവാഹിതരാകുന്ന ഓരോ ദമ്പതികള്‍ക്കും 35,000 രൂപയുടെ ആനുകൂല്യം സംസ്ഥാന സര്‍ക്കാര്‍ നല്‍കുന്നുണ്ട്. വധുവിന്റെ ബാങ്ക് അക്കൗണ്ടില്‍ 25,000 രൂപ നിക്ഷേപിക്കുകയും 10,000 രൂപയുടെ സമ്മാനങ്ങളുമാണു നല്‍കുന്നത്. സര്‍ക്കാര്‍ ആനുകൂല്യം ലഭിക്കുന്നതിന് ഇതിന് മുന്‍പും പലരും വ്യാജ വിവാഹം നടത്തിയിട്ടുണ്ട്. 2018ല്‍ നടന്ന സമൂഹ വിവാഹത്തില്‍, മുന്‍പ് വിവാഹിതരായവര്‍ വീണ്ടും വിവാഹം ചെയ്തിരുന്നു.