ഉയരങ്ങളിലെത്തിയിട്ടും വേരുകള്‍ മറന്നില്ല: ക്യാപ്റ്റന്‍ വരുണ്‍ സിങ്ങിനെ അനുസ്മരിച്ച് മോദി

കൂനൂര്‍ ഹെലികോപ്റ്റര്‍ അപകടത്തില്‍ പരുക്കേറ്റു മരണത്തിനു കീഴടങ്ങിയ ക്യാപ്റ്റന്‍ വരുണ്‍ സിങ്ങിനെ മന്‍ കി ബാത്തില്‍ അനുസ്മരിച്ചു പ്രധാനമന്ത്രി നരേന്ദ്ര മോദി. ഓഗസ്റ്റ് മാസത്തില്‍ ശൗര്യചക്ര പുരസ്‌കാരം സ്വീകരിച്ച ശേഷം സ്‌കൂള്‍ പ്രിന്‍സിപ്പലിന് വരുണ്‍ സിങ് അയച്ച കത്ത് പ്രധാനമന്ത്രി മന്‍ കി ബാത്തില്‍ വായിച്ചു കേള്‍പ്പിച്ചു. ഉയരങ്ങളിലെത്തിയിട്ടും തന്റെ വേരുകള്‍ അദ്ദേഹം മറന്നിട്ടില്ലെന്നതു തന്റെ ഹൃദയത്തെ സ്പര്‍ശിച്ചുവെന്നു മോദി പറഞ്ഞു. അദ്ദേഹം ആശുപത്രിയിലായിരുന്നപ്പോള്‍ ഹൃദയത്തെ സ്പര്‍ശിക്കുന്ന ഒരു കാര്യം ഞാന്‍ സമൂഹമാധ്യമത്തില്‍ കണ്ടു. 2021 ഓഗസ്റ്റിലാണ് അദ്ദേഹത്തിന് ശൗര്യചക്ര സമ്മാനിച്ചത്. അവാര്‍ഡിനു ശേഷം അദ്ദേഹം തന്റെ സ്‌കൂള്‍ പ്രിന്‍സിപ്പലിന് ഒരു കത്തെഴുതി. വിജയത്തിന്റെ നെറുകയിലായിരുന്നിട്ടും സ്വന്തം വേരുകള്‍ നനയ്ക്കാന്‍ അദ്ദേഹം മറന്നില്ലെന്നതാണു മനസ്സിലേക്ക് ആദ്യം വന്നത്- പ്രധാനമന്ത്രി പറഞ്ഞു. ജനറല്‍ ബിപിന്‍ റാവത്തിനൊപ്പം സഞ്ചരിക്കവേ ഡിസംബര്‍ എട്ടിനാണ് തമിഴ്‌നാട്ടിലെ കൂനൂരില്‍വച്ച് ഹെലികോപ്റ്റര്‍ അപകടമുണ്ടായത്. പരുക്കേറ്റു ദിവസങ്ങളോളം ആശുപത്രിയില്‍ ചികിത്സയില്‍ കഴിഞ്ഞ ശേഷമാണ് വരുണ്‍ സിങ് മരണത്തിനു കീഴടങ്ങിയത്.