രാഹുല്‍ ഗാന്ധി വീണ്ടും വിദേശത്ത്; അഭ്യഹങ്ങള്‍ പരത്തരുതെന്ന് കോണ്‍ഗ്രസ്

പുതുവത്സര ദിനം അടുത്തിരിക്കെ വിദേശത്തേക്ക് പോയി കോണ്‍ഗ്രസ് നേതാവ് രാഹുല്‍ ഗാന്ധി. വ്യക്തിപരമായ സന്ദര്‍ശനമാണെന്നും ഇത് സംബന്ധിച്ച് അഭ്യഹങ്ങള്‍ പരത്തരുതെന്നും കോണ്‍ഗ്രസ് ആവശ്യപ്പെട്ടു. ബുധനാഴ്ച രാവിലെയാണ് രാഹുല്‍ വിദേശത്തേക്ക് പോയത്. ' രാഹുല്‍ ഗാന്ധി വ്യക്തിപരമായ ഒരു ഹ്രസ്വ സന്ദര്‍ശനത്തിലാണ്. ബിജെപിയും അവരുടെ മാധ്യമങ്ങളും അനാവശ്യമായി അഭ്യൂഹങ്ങള്‍ പരത്തരുത്, കോണ്‍ഗ്രസ് ജനറല്‍ സെക്രട്ടറി രണ്‍ദീപ് സുര്‍ജേവാല പറഞ്ഞു. ഇറ്റലിയിലേക്കാണ് രാഹുല്‍ പോയതെന്നാണ് സൂചന. ഉത്തര്‍പ്രദേശ്, പഞ്ചാബ്, ഉത്തരാഖണ്ഡ്, ഗോവ, മണിപൂര്‍ എന്നീ അഞ്ച് സംസ്ഥാനങ്ങളില്‍ നിയമസഭാ തെരഞ്ഞെടുപ്പ് അടുത്തിരിക്കെയാഅണ് രാഹുലിന്റെ വിദേശ സന്ദര്‍ശനം. സന്ദര്‍ശനം കോണ്‍ഗ്രസിന്റെ തെരഞ്ഞെടുപ്പ് പ്രചാരണ പരിപാടികളെ ബാധിച്ചേക്കും. ജനുവരി മൂന്നിന് പഞ്ചാബിലെ മോഗ ജില്ലയിലെ റാലിയിലൂടെ സംസ്ഥാനത്തെ തെരഞ്ഞെടുപ്പ് പ്രചാരണം തുടങ്ങാനിരിക്കുകയായിരുന്നു കോണ്‍ഗ്രസ്. എന്നാല്‍ അന്ന് രാഹുല്‍ സ്ഥലത്തുണ്ടാവില്ലെന്നതിനാല്‍ പരിപാടി മാറ്റിവെച്ചേക്കുമെന്നാണ് സൂചനകള്‍. കോണ്‍ഗ്രസിന്റെ പരിപാടി നിശ്ചയിച്ചരിക്കുന്ന അതേദിവസം തന്നെ തങ്ങളുടെ പ്രചാരണം തുടങ്ങാനാണ് ബിജെപിയും പദ്ധതിയിടുന്നതെന്നാണ് സൂചനകള്‍. അടുത്തിടെ പാര്‍ലമെന്റ് ശീതകാല സമ്മേളനത്തിന് മുമ്പ് ഒരു മാസത്തോളം വിദേശയാത്രയിലായിരുന്നു രാഹുല്‍. സമ്മേളനം നടക്കുന്നതിന് ഒരു ദിവസം മുമ്പാണ് തിരിച്ചെത്തിയത്.