കോവിഡ് വാക്‌സീന്‍; രാജ്യത്ത് ആദ്യ ദിവസം സ്വീകരിച്ചത് 40 ലക്ഷം കൗമാരക്കാര്‍

15 മുതല്‍ 18 വയസ്സുവരെയുള്ളവര്‍ക്കു കോവിഡ് വാക്‌സീന്‍ വിതരണം ആരംഭിച്ച ആദ്യ ദിവസം 40 ലക്ഷത്തില്‍ അധികം കൗമാരക്കാര്‍ ആദ്യ ഡോസ് വാക്‌സീന്‍ സ്വീകരിച്ചതായി കേന്ദ്ര ആരോഗ്യമന്ത്രി ഡോ. മന്‍സൂഖ് മാണ്ഡവ്യ അറിയിച്ചു. മൂന്നാം തരംഗത്തിന്റെ സൂചനകള്‍ നല്‍കി ഇന്ത്യയിലെ ചില നഗരങ്ങളില്‍ കോവിഡ് ബാധിതരുടെ എണ്ണത്തില്‍ വന്‍ വര്‍ധന ഉണ്ടാകുന്നതിനിടെ, രാജ്യത്ത് 15 മുതല്‍ 18 വയസ്സുവരെ പ്രായമുള്ള കൗമാരക്കാര്‍ക്കുള്ള വാക്‌സീന്‍ വിതരണം തിങ്കളാഴ്ചയാണു ആരംഭിച്ചത്. 'ഇന്ന്, രാജ്യത്തെ യുവ ജനതയെ കോവിഡില്‍നിന്നു സംരക്ഷിക്കാനുള്ള സുപ്രധാന നീക്കത്തിനാണു നമ്മള്‍ തുടക്കം കുറിച്ചിരിക്കുന്നത്. വാക്‌സീന്‍ സ്വീകരിച്ച, 15നും 18നും മധ്യേ പ്രായമുള്ള എന്റെ എല്ലാ സുഹൃത്തുക്കള്‍ക്കും അഭിവാദ്യങ്ങള്‍. അവരുടെ മാതാപിതാക്കള്‍ക്കും അഭിവാദ്യങ്ങള്‍. വരും ദിവസങ്ങളില്‍ വാക്‌സീന്‍ സ്വീകരിക്കാന്‍ കൂടുതല്‍ കൗമാരക്കാരോട് ആഹ്വാനം ചെയ്യുന്നു'- പ്രധാനമന്ത്രി നരേന്ദ്ര മോദി ട്വീറ്റ് ചെയ്തു. സ്‌കൂളുകള്‍, ആശുപത്രികള്‍, പ്രാഥമിക ആരോഗ്യ കേന്ദ്രങ്ങള്‍ എന്നിവയുടെ സഹകരണത്തോടെയാണു വാക്‌സീന്‍ ഡ്രൈവ് നടപ്പാക്കിയത്. ഒട്ടേറെ സ്‌കൂളുകള്‍ വാക്‌സിനേഷന്‍ സെന്ററുകളായി. 2007നു മുന്‍പു ജനിച്ചവര്‍ക്കാണു വാക്‌സീന്‍ ഡ്രൈവില്‍ പങ്കെടുക്കാനുള്ള അര്‍ഹത. കൗമാരക്കാര്‍ക്കു കോവാക്‌സീന്‍ ഡോസുകള്‍ മാത്രം നല്‍കാനാണു കേന്ദ്ര ആരോഗ്യ മന്ത്രാലയത്തിന്റെ തീരുമാനം. 15-18 വരെ പ്രായമുള്ളവര്‍ക്കുള്ള കോവിഡ് വാക്‌സീന്‍ വിതരണം ജനുവരി മൂന്നിനു തുടങ്ങുമെന്നു ഡിസംബര്‍ 25നു പ്രധാനമന്ത്രി നരേന്ദ്ര മോദി പ്രഖ്യാപിച്ചിരുന്നു. ആരോഗ്യപ്രവര്‍ത്തകര്‍, കോവിഡ് മുന്‍നിര പോരാളികള്‍, മുതിര്‍ന്ന പൗരന്‍മാര്‍ തുടങ്ങിയവര്‍ക്കുള്ള 3-ാം ഡോസ് വാക്‌സീന്‍ ജനുവരി 10 മുതല്‍ വിതരണം ചെയ്തു തുടങ്ങും.