കര്‍ണാടകയില്‍ വാരാന്ത്യ കര്‍ഫ്യു; കേസുകള്‍ 20,000 ആയാല്‍ മുംബൈയില്‍ ലോക്ഡൗണ്‍

മഹാരാഷ്ട്രയില്‍ 24 മണിക്കൂറില്‍ 18,466 പേര്‍ക്കു കോവിഡ് 19 സ്ഥിരീകരിച്ചു. ഇതില്‍ 10,860 കേസുകളും തലസ്ഥാന നഗരിയായ മുംബൈയിലാണ്. ഇതില്‍ 9,665 പേര്‍ക്കും രോഗലക്ഷണങ്ങളില്ല. ഇരുപതു പേരാണു സംസ്ഥാനത്ത് പുതിയതായി രോഗം ബാധിച്ചു മരിച്ചത്. പ്രതിദിന കോവിഡ് കേസുകള്‍ ഇരുപതിനായിരം പിന്നിട്ടാല്‍ മുംബൈയില്‍ ലോക്ഡൗണ്‍ ഏര്‍പ്പെടുത്തുമെന്നു മേയര്‍ കിഷോരി പെഡ്‌നേക്കര്‍ അറിയിച്ചു. മഹാരാഷ്ട്രയില്‍ ചൊവ്വാഴ്ച 75 ഒമിക്രോണ്‍ കേസുകള്‍ സ്ഥിരീകരിച്ചു. ഇതില്‍ നാല്‍പതും മുംബൈയിലാണ്. രാജ്യത്ത് ഏറ്റവും കൂടുതല്‍ ഒമിക്രോണ്‍ കേസുകള്‍ റജിസ്റ്റര്‍ ചെയ്തതും മഹാരാഷ്ട്രയിലാണ്. ആകയുള്ള 1900ല്‍ 500 കേസുകളും മഹാരാഷ്ട്രയിലാണ്. അതേസമയം കോവിഡ് കേസുകള്‍ ഉയരുന്ന സാഹചര്യത്തില്‍ ഡല്‍ഹിയ്ക്കു പുറമേ കര്‍ണാടകയിലും വാരാന്ത്യ കര്‍ഫ്യൂ ഏര്‍പ്പെടുത്തും. സംസ്ഥാനത്ത് കൂടുതല്‍ നിയന്ത്രണങ്ങളും പ്രാബല്യത്തില്‍ വരും. വെള്ളിയാഴ്ച മുതല്‍ കര്‍ഫ്യൂ പ്രാബല്യത്തില്‍ വരും. വെള്ളിയാഴ്ച രാത്രി പത്തു മുതല്‍ തിങ്കളാഴ്ച രാവിലെ അഞ്ച് വരെയാണു നിയന്ത്രണങ്ങള്‍. അവശ്യ സര്‍വീസുകള്‍, ഹോട്ടലുകള്‍ എന്നിവ തുറന്നു പ്രവര്‍ത്തിക്കുമെന്നു സര്‍ക്കാര്‍ അറിയിച്ചു. 24 മണിക്കൂറിനുള്ളില്‍ 147 ഒമിക്രോണ്‍ കേസുകളാണ് കര്‍ണാടകയില്‍ റിപ്പോര്‍ട്ട് ചെയ്തത്. പുതിയതായി റിപ്പോര്‍ട്ട് ചെയ്യുന്ന കോവിഡ് കേസുകളില്‍ 85 ശതമാനവും ബെംഗളൂരുവിലാണെന്ന് സര്‍ക്കാര്‍ അറിയിച്ചു. രണ്ടാഴ്ചത്തേക്ക് സ്‌കൂളുകള്‍ അടയ്ക്കും. മാളുകള്‍, പബ്ബുകള്‍, ബാറുകള്‍, ജിംനേഷ്യം എന്നിവ 50 ശതമാനം ശേഷിയില്‍ പ്രവര്‍ത്തിക്കും.