‘ഹാക്കിങ് തുടങ്ങിയത് 15-ാം വയസ്സില്‍’; അവകാശവാദവുമായി ‘ബുള്ളി ബായ്’ നീരജ്

മുസ്‌ലിം സ്ത്രീകളെ അവഹേളിക്കാനായി നിര്‍മിച്ച 'ബുള്ളി ബായ്' ആപ്ലിക്കേഷനുമായി ബന്ധപ്പെട്ട കേസില്‍ അന്വേഷണം പുരോഗമിക്കവേ, താന്‍ 15 വയസ്സ് മുതല്‍ വെബ്‌സൈറ്റുകള്‍ ഹാക്ക് ചെയ്യുന്നുണ്ടെന്ന അവകാശവാദവുമായി അറസ്റ്റിലായ ആപ്പിന്റെ പ്രധാന സൂത്രധാരന്‍ അസം സ്വദേശി നീരജ് ബിഷ്‌ണോയി (21). പൊലീസിന്റെ ചോദ്യം ചെയ്യലിലാണ് വെളിപ്പെടുത്തല്‍. നീരജ് എപ്പോഴും കംപ്യൂട്ടറിന്റെ മുന്നിലായിരുന്നുവെന്ന് പിതാവ് പറഞ്ഞതായി പൊലീസ് അറിയിച്ചു. നീരജ് എന്താണ് ചെയ്യുന്നതെന്ന് കുടുംബാംഗങ്ങള്‍ക്ക് അറിയില്ലായിരുന്നു. വെബ്സൈറ്റുകള്‍ ഹാക്ക് ചെയ്തതായി നീരജ് അവകാശപ്പെടുന്നുണ്ട്. നീരജിന് അഞ്ച് ട്വിറ്റര്‍ അക്കൗണ്ടുകള്‍ ഉണ്ടെന്നും പൊലീസ് പറഞ്ഞു. ഇതില്‍ ഒരു അക്കൗണ്ട് സൗത്ത് വെസ്റ്റ് ഡല്‍ഹിയിലെ കിഷന്‍ഗഡ് പൊലീസ് സ്റ്റേഷനില്‍ റജിസ്റ്റര്‍ ചെയ്ത ഒരു എഫ്ഐആറുമായി ബന്ധപ്പെട്ടിരിക്കുന്നതായി കണ്ടെത്തി. മറ്റൊരു അക്കൗണ്ടുവഴി സ്ത്രീകളെ അപകീര്‍ത്തിപ്പെടുത്തുന്ന ട്വീറ്റുകളും കമന്റുകളും പോസ്റ്റു ചെയ്തിരുന്നതായി ഐഎഫ്എസ്ഒ സ്‌പെഷല്‍ സെല്‍ ഡിസിപി കെ.പി.എസ്.മല്‍ഹോത്ര പറഞ്ഞു.