ഗുണ്ടകളെ ഒന്നിച്ചുചേര്‍ത്ത് വന്‍ ഗ്യാങ്; വയനാട് ഡീല്‍ പാളി കിര്‍മാണിയും സംഘവും

വന്‍കിട ഗുണ്ടകളെ വിളിച്ചുവരുത്തി ബന്ധം ഊട്ടിയുറപ്പിച്ചശേഷം ക്വട്ടേഷന്‍ ഫീല്‍ഡില്‍ പുതിയ ഗ്യാങ് ഉണ്ടാക്കാനുള്ള പദ്ധതിയാണ് വയനാട് പടിഞ്ഞാറത്തറയിലെ റിസോര്‍ട്ടില്‍ നടന്നതെന്നു പൊലീസ്. കുപ്രസിദ്ധരായ പല ഗുണ്ടകളെയും വിരുന്നിനു ക്ഷണിച്ചിരുന്നുവെന്ന് പൊലീസ് പറയുന്നു. എന്നാല്‍, കിര്‍മാണി മനോജ് ഒഴികെ പ്രമുഖരാരും വന്നില്ല. സ്വര്‍ണക്കടത്ത് കേസിലുള്‍പെട്ട ഗുണ്ടകളിലൊരാള്‍ വയനാട്ടിലുണ്ടായിരുന്നെങ്കിലും ഒറ്റ് മണത്തറിഞ്ഞതിനാല്‍ റിസോര്‍ട്ടിലേക്കെത്തിയില്ല. പകരം ഇയാളുടെ അംഗരക്ഷകരെയാണ് അയച്ചത്. പൊലീസ് ചോദ്യം ചെയ്തു വിട്ടയച്ചവരില്‍ ചിലര്‍ക്കൊക്കെ ക്രിമിനല്‍ ബന്ധമുണ്ടെന്നും വിവരമുണ്ട്. വിവിധ ജില്ലകളിലായി പരസ്പരം അറിയാതെ ചിതറിക്കിടക്കുന്ന ഗുണ്ടകളെ ഒന്നിച്ചുചേര്‍ത്ത് വന്‍ ഗ്യാങ് ഉണ്ടാക്കി ഭാവിയില്‍ ക്വട്ടേഷന്‍ ഫീല്‍ഡില്‍ വന്‍ തുക പറഞ്ഞ് ഡീല്‍ ഉറപ്പിക്കാനുള്ള പദ്ധതി തയാറാക്കലാണ് റിസോര്‍ട്ടില്‍ നടന്നത്. ലഹരി പാര്‍ട്ടിയിലേക്കെത്തിച്ച കഞ്ചാവിന്റെയും ഹഷീഷിന്റെയും പണത്തിന്റെയും ഉറവിടവും പൊലീസ് അന്വേഷിക്കുന്നുണ്ട്. പ്രതികളുടെ ഫോണ്‍ വിവരങ്ങളും റിസോര്‍ട്ടിലെ സിസിടിവി ദൃശ്യങ്ങളും പൊലീസ് പരിശോധിക്കുന്നു. ഗുണ്ടകളെ സല്‍ക്കരിക്കാനായി ബുഫെ ഡിന്നറും ഡിജെ പാര്‍ട്ടിയും കമ്പളക്കാട് മുഹ്‌സിന്‍ ഒരുക്കി. ഗോവയില്‍നിന്ന് ലഹരിമരുന്നും എത്തിച്ചുവെന്നാണ് പൊലീസ് നല്‍കുന്ന വിവരം. അതിഥികള്‍ക്കു കരുതിവച്ച ലഹരിക്കു പുറമെ, റിസോര്‍ട്ടിലേക്കു സ്വന്തം നിലയില്‍ ലഹരിയെത്തിച്ചവരും ഉണ്ടായിരുന്നു. ലക്ഷക്കണക്കിനു രൂപയാണ് ആഘോഷച്ചടങ്ങിനു മുടക്കിയത്. വര്‍ഷങ്ങളായി വയനാട്ടില്‍ ഇത്തരം ലഹരി പാര്‍ട്ടി നടക്കുന്നുണ്ടെന്ന് പൊലീസ് ഉദ്യോഗസ്ഥര്‍ പറയുന്നു. എറണാകുളത്ത് മോഡലുകള്‍ കാറപകടത്തില്‍ മരിച്ച സംഭവവുമായി ബന്ധപ്പെട്ടു നടത്തിയ അന്വേഷണത്തിനിടെ, ഒന്നരവര്‍ഷം മുന്‍പ് വയനാട്ടില്‍ നടന്ന ഒരു ലഹരി പാര്‍ട്ടിയുടെ വിഡിയോ പൊലീസിനു കിട്ടിയിരുന്നു. ചില റിസോര്‍ട്ടുകള്‍ കേന്ദ്രീകരിച്ചു നടക്കുന്ന ഇത്തരം പ്രവര്‍ത്തനങ്ങള്‍ വയനാടിന്റെ ടൂറിസം മേഖലയിലാകെ ചീത്തപ്പേരുണ്ടാക്കുമെന്ന ആശങ്കയിലാണു സംരംഭകര്‍. ലഹരി ഉപയോഗത്തോടൊപ്പം അനാശ്യാസ പ്രവര്‍ത്തനങ്ങളും വന്യമൃഗവേട്ടയും നടക്കുന്നതായി ആരോപണമുണ്ട്. ഇതിനെല്ലാം സഹായത്തിനായി ക്വട്ടേഷന്‍ സംഘങ്ങളും പ്രവര്‍ത്തിക്കുന്നു. രണ്ടുമാസം മുന്‍പ് വെള്ളമുണ്ടയിലെ പെട്രോള്‍ പമ്പിലെത്തിയ ക്വട്ടേഷന്‍ സംഘത്തെ പൊലീസ് പിടികൂടിയിരുന്നു. റിസോര്‍ട്ടുകള്‍ കേന്ദ്രീകരിച്ചു ലഹരി വില്‍പന നടത്തിയവരെ അടുത്തിടെ എക്‌സൈസും പിടികൂടി.