സ്വര്‍ണക്കടത്ത് കേസ് : നടി അക്ഷര റെഡ്ഡിയെ ഇ ഡി ചോദ്യം ചെയ്തു

കോഴിക്കോട്: നെടുമ്പാശ്ശേരി വിമാനത്താവളത്തിലെ സ്വര്‍ണക്കടത്ത് കേസുമായി ബന്ധപ്പെട്ട് തമിഴ് കന്നഡ നടി അക്ഷര റെഡ്ഡിയെ എന്‍ഫോഴ്സ്മെന്റ് ഡയറക്ട്രേറ്റ് ചോദ്യം ചെയ്തു. കോഴിക്കോട് ഇഡി ഓഫീസില്‍ വെച്ചാണ് അന്വേഷണ ഉദ്യോഗസ്ഥര്‍ നടിയെ വിശദമായി ചോദ്യം ചെയ്തത്. ഇന്നലെ രാവിലെ 10.30 നാണ് കര്‍ണാടകയില്‍ നിന്നും അന്വേഷണ ഉദ്യോഗസ്ഥര്‍ക്ക് മുന്നില്‍ നടി ഹാജരായത്. വടകര സ്വദേശി ഫായിസ് ഉള്‍പ്പെട്ട നെടുമ്പാശേരി സ്വര്‍ണക്കടത്ത് കേസുമായി ബന്ധപ്പെട്ടാണ് ചോദ്യം ചെയ്യല്‍. 2013-ല്‍ നെടുമ്പാശേരി വിമാനത്താവളം വഴി കടത്താന്‍ ശ്രമിച്ച 20 കിലോഗ്രാം സ്വര്‍ണം കസ്റ്റംസ് പിടികൂടിയിരുന്നു. ഈ സ്വര്‍ണം പ്രമുഖ ജ്വല്ലറികളിലേക്ക് അടക്കം എത്തിച്ചതാണെന്നായിരുന്നു കസ്റ്റംസ് കണ്ടെത്തല്‍. കേസിലെ മുഖ്യ പ്രതിയായ ഫായിസിന്റെ ഉന്നത ബന്ധങ്ങളും നേരത്തെ വിവാദമായിരുന്നു. ഫയാസുമായ് നടി സാമ്പത്തിക ഇടപാടുകള്‍ നടത്തിയെന്ന് കണ്ടെത്തിയതിനെ തുടര്‍ന്നാണ് വിളിച്ചു വരുത്തിയത്. മോഡല്‍ കൂടിയായ അക്ഷര റെഡ്ഡി നേരത്തെ തമിഴ് ബിഗ് ബോസിലും പങ്കെടുത്ത് ശ്രദ്ധേയയായിരുന്നു.