പീഡിപ്പിച്ച് കാട്ടിലുപേക്ഷിച്ചു; 6 ദിവസത്തിന് ശേഷം കണ്ടെത്തിയ യുവതി മരിച്ചു

ജയ്പുര്‍ പീഡിപ്പിച്ച ശേഷം കാട്ടില്‍ ഉപേക്ഷിക്കുകയും 6 ദിവസത്തിനുശേഷം അബോധാവസ്ഥയില്‍ കണ്ടെത്തുകയും ചെയ്ത യുവതി ആശുപത്രിയില്‍ ചികിത്സയിലിരിക്കെ മരിച്ചു. രാജസ്ഥാനിലെ നഗൗര്‍ ജില്ലയിലാണു വ്യാഴാഴ്ച 35 വയസ്സുകാരി മരിച്ചത്. രക്ഷപ്പെടുത്തിയതു മുതല്‍ വെന്റിലേറ്ററിലാണു യുവതി കഴിഞ്ഞിരുന്നതെന്നും കുറച്ച് ഓക്സിജന്‍ സ്വീകരിക്കാനുള്ള ശേഷിയേ തലച്ചോറിന് ഉണ്ടായിരുന്നുള്ളൂ എന്നും എസ്പി രാം മൂര്‍ത്തി പറഞ്ഞു. ഫെബ്രുവരി നാലിനാണു യുവതിയെ കാണാതായത്. രണ്ടു ദിവസത്തിനു ശേഷം കുടുംബം പരാതി നല്‍കി. ഗ്രാമത്തിന് 3 കിലോമീറ്റര്‍ ദൂരെയുള്ള കാട്ടില്‍ 10-ാം തീയതി യുവതിയെ അബോധാവസ്ഥയില്‍ കണ്ടെത്തി. സംഭവവുമായി ബന്ധപ്പെട്ട് ഒരാളെ അറസ്റ്റ് ചെയ്തു. ഇയാളുടെ സഹായിയായ പ്രായപൂര്‍ത്തിയാകാത്ത ഒരാളെ കസ്റ്റഡിയിലെടുത്തു. പീഡനത്തിനു പിന്നാലെ മരിച്ചെന്നു കരുതിയാണു യുവതിയെ കാട്ടില്‍ ഉപേക്ഷിച്ചതെന്നു പ്രതികള്‍ പറഞ്ഞു. കൂട്ടബലാത്സംഗം ഉള്‍പ്പെടെയുള്ള വകുപ്പുകളാണു പ്രതികള്‍ക്കെതിരെ ചുമത്തിയിട്ടുള്ളത്. ഒരു പ്രതി ജയിലിലും പ്രായപൂര്‍ത്തിയാകാത്തയാള്‍ ജുവനൈല്‍ ഹോമിലുമാണ്. പരാതി കിട്ടിയിട്ടും യുവതിയെ കണ്ടെത്താന്‍ യാതൊരു നടപടിയും എടുക്കാതിരുന്നതിനു രണ്ടു പൊലീസുകാരെ സസ്‌പെന്‍ഡ് ചെയ്തു.