ഹരിദാസനെ വധിക്കാന്‍ പദ്ധതിയിട്ടത് കൗണ്‍സിലര്‍ ലിജേഷ്; നിര്‍ണായക തെളിവായത് വാട്സ്ആപ്പ് കോള്‍

കണ്ണൂര്‍: തലശേരിയില്‍ സിപിഎം പ്രവര്‍ത്തകനായ ഹരിദാസന്‍ കൊല്ലപ്പെട്ട സംഭവത്തില്‍ മുഖ്യ സൂത്രധാരന്‍ ബിജെപി മണ്ഡലം പ്രസിഡന്റും തലശേരി നഗരസഭാ കൗണ്‍സിലറുമായ ലിജേഷാണെന്ന് പൊലീസ്. കേസില്‍ ലിജീഷ് ഉള്‍പ്പടെ നാല്പേരുടെ അറസ്റ്റ് പൊലീസ് രേഖപ്പെടുത്തി. ലിജീഷിന് പുറമെ കെ.വി വിമിന്‍, അമല്‍ മനോഹരന്‍, സുമേഷ് എന്നിവരാണ് അറസ്റ്റിലായത്. സംഭവ ദിവസം പുലര്‍ച്ചെ ഒരുമണിക്ക് ലിജേഷ് നടത്തിയ വാട്സ്ആപ്പ് കോളാണ് നിര്‍ണായക തെളിവായി പൊലീസിന് ലഭിച്ചത്. ലിജീഷ് വിളിച്ച കോള്‍ ആളുമാറി അദ്ദേഹത്തിന്റെ ബന്ധുവിലേക്കാണ് എത്തിയത്. തുടര്‍ന്ന് ബന്ധു ലിജീഷിനെ തിരിച്ചു വിളിച്ചിരുന്നു. പിന്നീട് ലിജീഷ് വിളിച്ചത് അറസ്റ്റിലായ സുമേഷിനെയാണ്. ഇയാളാണ് ഹരിദാസന്‍ ഹാര്‍ബറില്‍ നിന്ന് വീട്ടിലേക്ക് എത്തിയ കാര്യം ഇവരെ അറിയിക്കുന്നത്. ഒരാഴ്ചയോളമുള്ള ആസൂത്രണമായിരുന്നു ഇവര്‍ കൊലപാതകത്തിനായി നടത്തിയിരുന്നത്. ലിജേഷ് ആത്മജ് എന്ന ബിജെപി പ്രവര്‍ത്തകന്‍ ഉള്‍പ്പെടുന്ന സംഘത്തെ തയ്യാറാക്കി നിര്‍ത്തിയിരുന്നു. ഈ സംഘം ഹരിദാസനെയും പ്രതീക്ഷിച്ച് വീടിന് മുന്നില്‍ തയ്യാറായി നിന്നു. രണ്ട് ബൈക്കുകളിലായിരുന്നു ഇവര്‍ എത്തിയത്. തുടര്‍ന്ന് വീടിന് സമീപത്ത് എത്തിയ ഹരിദാസനെ സംഘം ആക്രമിക്കുകയായിരുന്നു. കൊലപാതകത്തില്‍ നേരിട്ട് പങ്കെടുത്ത സംഘത്തെയാണ് ഇനി പിടികിട്ടാനുള്ളത്. അതിനുവേണ്ടിയുള്ള അന്വേഷണം പൊലീസ് ഊര്‍ജിതമാക്കിക്കക്കഴിഞ്ഞു. സൂത്രധാരനായ ലിജേഷിന്റെ വിവാദ പ്രസംഗമാണ് കേസില്‍ നിര്‍ണായക തെളിവുകളിലൊന്നായി പൊലീസ് പരിഗണിക്കുന്നത്. പ്രതികളില്‍ ചിലര്‍ക്ക് മാഹിയില്‍ സിപിഎം പ്രവര്‍ത്തകനായിരുന്ന കണ്ണിപ്പൊയില്‍ ബാബു കൊലക്കേസിലും പങ്കുള്ളതായി പൊലീസിന് വിവരം ലഭിച്ചിട്ടുണ്ട്.