സിപി മാത്യുവിന്റെ അശ്ലീല പരാമര്‍ശം; പൊലീസില്‍ പരാതി നല്‍കി രാജി ചന്ദ്രന്‍

ഇടുക്കി ഡിസിസി പ്രസിഡണ്ട് സിപി മാത്യുവിന്റെ അശ്ലീല പരാമര്‍ശത്തിനെതിരെ പൊലീസില്‍ പരാതി നല്‍കി ഇടുക്കി ബ്ലോക്ക് പഞ്ചായത്ത് പ്രസിഡന്റ് രാജി ചന്ദ്രന്‍. ഇടുക്കി ഡിവൈഎസ്പിക്കാണ് പരാതി നല്‍കിയത്. പരാതിയില്‍ രാജി ചന്ദ്രന്റെ മൊഴി പൊലീസ് രേഖപ്പെടുത്തി. വിവാദ പരാമര്‍ശത്തിന് തൊട്ടുപിന്നാലെ സിപി മാത്യുവിനെതിരെ പരാതി നല്‍കുമെന്ന് സിപിഐഎമും, രാജി ചന്ദ്രനും പറഞ്ഞിരുന്നു. കോണ്‍ഗ്രസില്‍ നിന്ന് കൂറുമാറി സിപിഐഎമില്‍ ചേര്‍ന്ന രാജി ചന്ദ്രനെതിരെ യുഡിഎഫ് നടത്തിയ പ്രതിഷേധത്തിനിടെ ആയിരുന്നു സിപി മത്യുവിന്റെ വിവാദ പരാമര്‍ശം. പ്രസ്താവന പിന്‍വലിക്കാനും സിപി മാത്യു തയാറായില്ല. ബ്ലോക്ക് പഞ്ചായത്ത് ഓഫീസിലേക്ക് യുഡിഎഫ് നടത്തിയ പ്രതിഷേധ മാര്‍ച്ചിലായിരുന്നു സിപി മാത്യുവിന്റെ വിവാദ പ്രസംഗം. യുഡിഎഫ് അംഗം കൂറുമാറിയതിനെ തുടര്‍ന്ന്, ഇടുക്കിയിലെ തദ്ദേശ സ്ഥാപനങ്ങളില്‍ ചില പഞ്ചായത്തുകളുടെയും ബ്ലോക്ക് പഞ്ചായത്തിന്റെയും ഭരണം യുഡിഎഫിന് നഷ്ടമായിരുന്നു. ഏറ്റവും അവസാനമാണ് ബ്ലോക്ക് പഞ്ചായത്ത് പ്രസിഡന്റായിരുന്ന രാജി ചന്ദ്രന്‍ സിപിഐഎമിലേക്ക് കൂറുമാറിയത്. ഇതോടെ ഭരണം സിപിഐമിനു ലഭിച്ചു. ഇതിനു പിന്നാലെയാണ് ബ്ലോക്ക് പഞ്ചായത്ത് ഓഫീസിലേക്ക് യുഡിഎഫ് പ്രതിഷേധ മാര്‍ച്ച് നടത്തിയത്. ലൈംഗികച്ചുവയോടെയാണ് സിപി മാത്യു സംസാരിച്ചത്. സ്ത്രീകള്‍ അടങ്ങുന്ന സദസ്സിനോടായിരുന്നു സിപി മാത്യുവിന്റെ പരാമര്‍ശം. അടുത്ത് പല നേതാക്കളും പ്രവര്‍ത്തകരുമൊക്കെ ഉണ്ടായിരുന്നെങ്കിലും സിപി മാത്യുവിനെ ആരും തിരുത്താന്‍ തയ്യാറായില്ല.