റഷ്യ – യുക്രൈന്‍ യുദ്ധം: കുത്തനെ ഉയര്‍ന്ന് ക്രൂഡോയില്‍ വില, ഇന്ധനവില ഉയരാതിരിക്കാന്‍ ശ്രദ്ധിച്ച് കേന്ദ്രം

ന്യൂഡല്‍ഹി: റഷ്യ-യുക്രൈന്‍ യുദ്ധത്തിനിടെ ക്രൂഡോയില്‍ വില കുത്തനെ ഉയരുകയാണ്. ഈ അവസ്ഥയില്‍ രാജ്യത്ത് ഇന്ധന വില വര്‍ധിക്കാതിരിക്കാനുള്ള എല്ലാവിധ നടപടികളും സ്വീകരിച്ചു വരികയാണെന്ന് കേന്ദ്രം അറിയിച്ചു. ആഗോളതലത്തിലുള്ള നിലവിലെ സ്ഥിതി സൂക്ഷ്മമായി നിരീക്ഷിച്ചു വരികയാണെന്നും ഇന്ധന വിതരണം സുഖമമാകുന്നതിനുള്ള നടപടികള്‍ സ്വീകരിച്ചു വരികയാണെന്നും കേന്ദ്ര പെട്രോളിയം മന്ത്രാലയം ശനിയാഴ്ച വ്യക്തമാക്കി. യുക്രൈയിനെതിരേ റഷ്യ സൈനിക നടപടി പ്രഖ്യാപിച്ചതോടെ ആഗോള വിപണിയില്‍ അസംസ്‌കൃത എണ്ണവില ബാരലിന് 100 ഡോളര്‍ കടന്നിരിക്കുകയാണ്. ഏഴുവര്‍ഷത്തിനിടെ ഇതാദ്യമായാണ് അസംസ്‌കൃത എണ്ണവില 100 ഡോളര്‍ പിന്നിടുന്നത്. എന്നാല്‍ ഇതിന്റെ പ്രതിഫലനം രാജ്യത്ത് ഉണ്ടാവാതിരിക്കാനാണ് കേന്ദ്രം ശ്രമിക്കുന്നത്. ക്രൂഡോയില്‍ വില നിയന്ത്രിക്കുന്നതിന് കരുതല്‍ ശേഖരത്തില്‍ നിന്ന് കൂടുതല്‍ എണ്ണ പുറത്തിറക്കാന്‍ സര്‍ക്കാര്‍ തയ്യാറാണെന്നും പെട്രോളിയം മന്ത്രാലയം അറിയിച്ചു. അസംസ്‌കൃത എണ്ണവില ഉയര്‍ന്നെങ്കിലും അഞ്ചു സംസ്ഥാനങ്ങളില്‍ നിയമസഭാ തിരഞ്ഞെടുപ്പ് നടക്കുന്ന സാഹചര്യം മുന്‍നിര്‍ത്തി നവംബര്‍ നാലിനുശേഷം രാജ്യത്ത് പെട്രോള്‍-ഡീസല്‍ വിലയില്‍ മാറ്റം വരുത്തിയിട്ടില്ല. 2021 നവംബര്‍ 4 മുതല്‍ 113 ദിവസത്തേക്ക് മാറ്റമില്ലാതെ തുടരുന്ന പെട്രോള്‍, ഡീസല്‍ വില (ദീപാവലിക്ക് എക്‌സൈസ് തീരുവ കുറച്ചതിനെത്തുടര്‍ന്ന് നേരിയ തോതില്‍ മാറ്റം വന്നിരുന്നു) റഷ്യ - യുക്രൈന്‍ യുദ്ധത്തില്‍ ഉടലെടുത്ത ആഗോള രാഷ്ട്രീയ പ്രതിസന്ധി കാരണം ഇന്ധനവില വീണ്ടും ഉയര്‍ന്നേക്കുമെന്ന ഊഹാപോഹങ്ങള്‍ക്കിടയിലാണ് കേന്ദ്ര സര്‍ക്കാരിന്റെ ഉറപ്പ്.