പൊലീസിനെതിരെ അസഭ്യം: കൊടിക്കുന്നില്‍ സുരേഷിനെതിരെ കേസ്

ചെങ്ങന്നൂരില്‍ കെ റെയില്‍ സമരത്തിനിടെ പൊലീസിനെതിരെ അസഭ്യം പറഞ്ഞതിന് കൊടിക്കുന്നില്‍ സുരേഷ് എംപിക്കെതിരെ കേസ്. അതേസമയം, പൊലീസ് തന്നെ അപമാനിച്ചെന്നും പരാതി നല്‍കുമെന്നും എംപി പറഞ്ഞു. കഴിഞ്ഞ ദിവസം ചെങ്ങന്നൂരില്‍ സില്‍വര്‍ ലൈന്‍ പദ്ധതിയുടെ കല്ലിടാന്‍ എത്തിയവരെ കൊടിക്കുന്നില്‍ സുരേഷ് എംപിയുടെ നേതൃത്വത്തിലാണ് നാട്ടുകാര്‍ നേരിട്ടത്. ഇതിനിടെയായിരുന്നു എംപി പൊലീസ് ഉദ്യോഗസ്ഥനോട് ക്ഷോഭിച്ചത്. എന്നാല്‍ തന്നെ ഏല്‍പ്പിച്ച ജോലി പൂര്‍ത്തിയാക്കാതെ മടങ്ങില്ലെന്ന് ഉദ്യോഗസ്ഥന്‍ പറഞ്ഞതോടെ എംപി രോഷാകുലനാകുകയായിരുന്നു. 'തെമ്മാടിത്തരം കാണിക്കരുത്. താന്‍ ആരാണ്? ഒരു സബ് ഇന്‍സ്‌പെക്ടര്‍. തന്നെക്കാളും വലിയ ആളാടോ ഞാന്‍. തന്റെ മുകളിലുള്ള ഉദ്യോഗസ്ഥരെക്കാളും വലിയ ആളാണ് ഞാന്‍. ഞാന്‍ ഇവിടുത്തെ ജനപ്രതിനിധിയാണ്. അവര്‍ രോഷത്തിലാണ്. നിങ്ങള്‍ മടങ്ങി പോകണം.' നാട്ടുകാര്‍ക്കൊപ്പം നിന്ന് എംപി പൊലീസുകാരനോട് പറഞ്ഞത്.