പെണ്‍കുട്ടികളെ തട്ടിക്കൊണ്ടുപോകാന്‍ ശ്രമിച്ച യുവാവ് പിടിയില്‍

ഡല്‍ഹി വിവേക് വിഹാറില്‍ പ്രായപൂര്‍ത്തിയാകാത്ത പെണ്‍കുട്ടികളെ തട്ടികൊണ്ട് പോകാന്‍ ശ്രമിച്ച യുവാവ് പിടിയില്‍. പെണ്‍കുട്ടികളെ ഭിക്ഷ യാചിക്കാന്‍ കൊണ്ടുപോകുകയായിരുന്നു ഇയാള്‍. 40 കാരനായ പ്രതി സഞ്ജയ് മയക്കുമരുന്നിന് അടിമയാണെന്ന് പൊലീസ് അറിയിച്ചു. ഇ-റിക്ഷാ ഡ്രൈവറുടെ സഹായത്തോടെയാണ് ഇയാളെ പൊലീസ് പിടികൂടിയത്. പെണ്‍കുട്ടികള്‍ സുരക്ഷിതരാണെന്നും രക്ഷിതാക്കള്‍ക്ക് കൈമാറിയതായും പൊലീസ് കൂട്ടിച്ചേര്‍ത്തു. വിവേക് വിഹാറിലെ ബാലാജി ക്ഷേത്രത്തില്‍ നിന്ന് ചിന്താമണി ചൗക്കിലേക്ക് രണ്ട് പെണ്‍കുട്ടികളുമായി സഞ്ജയ് ഇ-റിക്ഷയില്‍ കയറി. ഇയാളുടെ സംസാരത്തില്‍ സംശയം തോന്നിയ ഡ്രൈവര്‍ യുവാവിനോട് പെണ്‍കുട്ടികളെ കുറിച്ച് ചോദിച്ചെങ്കിലും മറുപടി ലഭിച്ചില്ല. തുടര്‍ന്ന് റോഡരികില്‍ നിന്നിരുന്ന ട്രാഫിക് പൊലീസുകാരെ വിവരം അറിയിച്ചു. തുടര്‍ച്ചയായ ചോദ്യം ചെയ്യലില്‍, പ്രതിയെ 40 വയസ്സുള്ള സഞ്ജയ് ആണെന്നും ബീഹാറിലെ ഛപ്ര ജില്ലയില്‍ താമസക്കാരനാണെന്നും തിരിച്ചറിഞ്ഞു. ഭക്ഷണം നല്‍കാനെന്ന വ്യാജേന പെണ്‍കുട്ടികളെ തട്ടിക്കൊണ്ടുപോയി ഡല്‍ഹിക്ക് പുറത്തേക്ക് ഭിക്ഷാടനത്തിനെത്തിക്കുകയായിരുന്നെന്ന് പ്രതി വെളിപ്പെടുത്തി.