ധനമന്ത്രി കെ.എന്‍. ബാലഗോപാല്‍ അവതരിപ്പിക്കുന്ന ആദ്യ സമ്പൂര്‍ണ ബജറ്റ് നാളെ

കൊവിഡ് സൃഷ്ടിച്ച പ്രശ്‌നങ്ങളും കേന്ദ്രത്തില്‍നിന്നുള്ള വിഹിതത്തിലെ കുറവും മൂലം സംസ്ഥാനം കടുത്ത സാമ്പത്തിക പ്രതിസന്ധിയെ അഭിമുഖീകരിക്കുന്ന സാഹചര്യത്തിലാണ് ബജറ്റ്. ജിഎസ്ടി നിലവില്‍ വന്നതോടെ സംസ്ഥാനത്തിനു നികുതിനിരക്കുകള്‍ വര്‍ധിപ്പിക്കുന്നതിനുള്ള സാധ്യതകള്‍ പരിമിതമായി. ഇന്ധനം, മദ്യം, മോട്ടോര്‍ വാഹനം, രജിസ്‌ട്രേഷന്‍ തുടങ്ങിയ മേഖലകളില്‍ മാത്രമാണ് നികുതി വര്‍ധിപ്പിക്കാന്‍ സാധിക്കുന്നത്. മദ്യം, ഇന്ധനം എന്നിവയ്ക്ക് ഇപ്പോള്‍തന്നെ ഉയര്‍ന്ന നികുതി ഈടാക്കുന്നതിനാല്‍ വര്‍ധനയ്ക്കു സാധ്യതയില്ല. ഭൂമിയുടെ ന്യായവിലയില്‍ വര്‍ധന വരുത്തിയേക്കും. സര്‍ക്കാര്‍ സേവനങ്ങള്‍ക്കുള്ള നിരക്കുകളും വര്‍ധിപ്പിച്ചേക്കും. കഴിഞ്ഞ വര്‍ഷം ബാലഗോപാല്‍ ബജറ്റ് അവതരിപ്പിച്ചിരുന്നെങ്കിലും മുന്പ് അവതരിപ്പിച്ച ബജറ്റിന്റെ പുതുക്കിയ രൂപം മാത്രമായിരുന്നു . നികുതി ചോര്‍ച്ച പരമാവധി കുറച്ചു നികുതി പിരിവ് കാര്യക്ഷമമാക്കുന്നതിനുള്ള നടപടികള്‍ ബജറ്റില്‍ ഇടംപിടിച്ചേക്കും. ചെലവുകളില്‍ വന്‍ വര്‍ധന വരുന്ന തരത്തിലുള്ള പ്രഖ്യാപനങ്ങളും ഉണ്ടാകില്ല.