അവിശ്വാസം പരാജയപ്പെട്ടു

തൃശ്ശൂര്‍ കോര്‍പ്പറേഷന്‍ ഭരണത്തിനെതിരെ കോണ്‍ഗ്രസ്സ് കൊണ്ടുവന്ന അവിശ്വാസം പരാജയപ്പെട്ടു.പ്രതിപക്ഷത്തുനിന്നും ബിജെപി അംഗങ്ങള്‍ അവിശ്വാസ പ്രമേയത്തില്‍ നിന്നും വിട്ടുനിന്നു.24നെതിരെ 25 വോട്ടുകള്‍ക്കാണ് അവിശ്വാസ പ്രമേയം പരാജയപ്പെട്ടത്. 6 അംഗങ്ങളുള്ള ബിജെപി, കോണ്‍ഗ്രസ് കൊണ്ടുവന്ന പ്രമേയത്തെ അനകൂലിയ്ക്കാതെ വിട്ടു നില്‍ക്കുകയായിരുന്നു.ജില്ലാ കലക്ടര്‍ ഹരിത വി കുമാറിന്റെ അദ്ധ്യക്ഷതയിലായിരുന്നു തൃശ്ശൂര്‍ കോര്‍പ്പറേഷന്‍ കോണ്‍ഫറന്‍സ് ഹാളില്‍ അവിശ്വാസ പ്രമേയ ചര്‍ച്ച ആരംഭിച്ചത്. പ്രതിപക്ഷ നേതാവ് രാജന്‍ ജെ പല്ലനാണ് അവിശ്വാസ പ്രമേയം അവതരിപ്പിച്ചത്. പ്രതിപക്ഷത്തുനിന്നും രാജന്‍ ജെ പല്ലനു പുറമേ ഉപനേതാവ് സുനില്‍ രാജ്, ജോണ്‍ ഡാനിയേല്‍ തുടങ്ങിയവര്‍ സംസാരിച്ചു. പ്രതിപക്ഷ ആരോപണങ്ങള്‍ തള്ളിയും പ്രമേയത്തെ എതിര്‍ത്തും മേയര്‍ എം കെ വര്‍ഗ്ഗീസ്, ഡെപ്യൂട്ടി മേയര്‍ രാജശ്രീ ഗോപന്‍, പി കെ ഷാജന്‍, വര്‍ഗ്ഗീസ് കണ്ടങ്കുളത്തി തുടങ്ങിയവരും സംസാരിച്ചു. തുടര്‍ന്നായിരുന്നു അവിശ്വാസ പ്രമേയത്തിന്മേല്‍ വോട്ടെടുപ്പു നടന്നത്. 55 അംഗ കോര്‍പ്പറേഷന്‍ സഭയില്‍ ഭരണപക്ഷത്തിന് 25 വോട്ടും പ്രധാന പ്രതിപക്ഷമായ കോണ്‍ഗ്രസ്സിന് 24 വോട്ടും ലഭിച്ചു.ഇതോടെ അവിശ്വാസ പ്രമേയം പരാജയപ്പെട്ടതായി ജില്ലാ കലക്ടര്‍ ഹരിത വി കുമാര്‍ അറിയിയ്ക്കുകയായിരുന്നു.