ബാലികയെ തട്ടിക്കൊണ്ടു പോയി പീഡിപ്പിച്ചു; പ്രതിയെ വെടിവച്ചിട്ട് പൊലീസ്

അഞ്ചു വയസ്സുകാരിയെ ലൈംഗികമായി പീഡിപ്പിച്ചയാളെ ഡല്‍ഹി പൊലീസ് ഏറ്റുമുട്ടലിലൂടെ പിടികൂടി. ഷാഹ്ബാദ് ദൗലത്പുര്‍ സ്വദേശി മുഹമ്മദ് അക്തറിനെയാണ് (28) പിടിയിലായത്. ഏറ്റുമുട്ടലില്‍ കാലിനു വെടിയേറ്റു. ഈ മാസം 9നാണു കുട്ടിയെ കാണാതായത്. വീടിനു പുറത്തു കളിച്ചു കൊണ്ടു നിന്നിരുന്ന കുട്ടിയെ വൈകിട്ട് ഏഴു മണിയോടെ കാണാതായതെന്നു കാട്ടി മാതാപിതാക്കള്‍ പരാതി നല്‍കിയിരുന്നു. പിറ്റേന്നു രാവിലെ പെണ്‍കുട്ടിയെ അയല്‍വാസി വീട്ടിലെത്തിച്ചു. സമീപത്തുനിന്നു കണ്ടെത്തിയെന്നാണ് ഇദ്ദേഹം പറഞ്ഞത്. കൗണ്‍സിലറെത്തി കുട്ടിയെ ആശുപത്രിയിലെത്തിച്ചു. വൈദ്യ പരിശോധനയില്‍ ഒന്നും കണ്ടെത്താനായില്ല. കൗണ്‍സിലറോടും കുട്ടി ഒന്നും വെളിപ്പെടുത്തിയില്ല. കുട്ടിയുടെ മൊഴിയും രേഖപ്പെടുത്തി മാതാപിതാക്കളോടൊപ്പം വീട്ടിലേക്ക് അയച്ചു. ശനിയാഴ്ച കുട്ടിയുടെ ആരോഗ്യനില മോശമായതോടെ വീണ്ടും ആശുപത്രിയിലാക്കി. സ്വകാര്യ ഭാഗത്തു മുറിവുള്ളതായും കണ്ടെത്തി. ഇതോടെയാണു ലൈംഗിക അതിക്രമത്തിന് ഇരയായതെന്നു സ്ഥിരീകരിച്ചത്. അന്വേഷണത്തില്‍ മുഹമ്മദ് അക്തര്‍ സംഭവത്തില്‍ ഉള്‍പ്പെട്ടതായി കണ്ടെത്തി. രോഹിണി സെക്ടര്‍ 29ലെ ഓള്‍ഡ് പ്രഹ്ലാദ്പുര്‍ റോഡില്‍വച്ചു പ്രതിയെ പൊലീസ് പിടികൂടാന്‍ ശ്രമിച്ചെങ്കിലും പ്രതി വെടിയുതിര്‍ത്തു. പൊലീസ് സംഘം തിരികെ വെടിവച്ചുവെന്നും കാലില്‍വെടിയേറ്റുവെന്നും ഡിസിപി ബ്രിജേന്ദ്ര കുമാര്‍ യാദവ് പറഞ്ഞു.