‘സിപിഐ വിലപേശുന്ന പാര്‍ട്ടിയല്ല’; ശ്രേയാംസ് കുമാറിന്റെ ആരോപണത്തില്‍ ഉറച്ച നിലപാടുമായി കോടിയേരി

തിരുവനന്തപുരം: രാജ്യസഭാ സീറ്റിനെ ചൊല്ലി എല്‍ഡിഎഫിലും അതൃപ്തി പുറത്ത് വന്നതിന് പിന്നാലെ സിപിഐയെ പിന്തുണച്ച് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. സിപിഐ രാജ്യസഭാ സീറ്റ് വിലപേശി വാങ്ങിയെന്ന ആരോപണം ശരിയല്ലെന്ന് കോടിയേരി ബാലകൃഷ്ണന്‍ പറഞ്ഞു. ഒഴിവുവന്നതില്‍ ജയസാധ്യതയുള്ള ഒരു സീറ്റ് സിപിഐക്ക് കൊടുക്കാനുള്ള തീരുമാനം എല്‍ഡിഎഫാണ് സ്വീകരിച്ചത്. സിപിഐ വിലപേശുന്ന പാര്‍ട്ടിയല്ലെന്നും കോടിയേരി പറഞ്ഞു. രാജ്യസഭാ സീറ്റില്‍ എല്‍ജെഡി അവകാശ വാദം ഉന്നയിച്ചിരുന്നു. ഇത് മുന്നണിയില്‍ ഉന്നയിച്ചെങ്കിലും സിപിഎമ്മും സിപിഐയും ഓരോ സീറ്റ് വീതം പങ്കുവെക്കുകയായിരുന്നു. ഇതോടെയാണ് ഇന്ന് ശ്രേയാംസ് കുമാര്‍ അതൃപ്തി പരസ്യമാക്കി രംഗത്ത് വന്നത്. രാജ്യസഭാ സീറ്റ് സിപിഐ വിലപേശി വാങ്ങിയതാണെന്നായിരുന്നു അദ്ദേഹത്തിന്റെ ആക്ഷേപം. കോഴിക്കോട് മാധ്യമപ്രവര്‍ത്തകരുമായി സംസാരിക്കുകയായിരുന്നു അദ്ദേഹം. മന്ത്രി സ്ഥാനവും രാജ്യസഭ സീറ്റും കിട്ടാത്തതില്‍ അതാത് സമയത്ത് മുന്നണിയില്‍ അതൃപ്തി അറിയിച്ചിട്ടുണ്ടെന്ന് ശ്രേയാംസ്‌കുമാര്‍ പറഞ്ഞു. വിലപേശലിന്റെ ഭാഗമായാണ് സിപിഐക്ക് രാജ്യസഭാ സീറ്റ് കിട്ടിയത്. സില്‍വര്‍ ലൈന്‍, ലോകായുക്ത തുടങ്ങിയ വിഷയങ്ങളില്‍ സിപിഐയുടെ നിലപാട് എന്തെന്ന് നിരീക്ഷിക്കുമെന്നും അദ്ദേഹം വ്യക്തമാക്കി. രാജ്യസഭയിലേക്ക് സിപിഐ സ്ഥാനാര്‍ത്ഥിയെ മത്സരിപ്പിക്കാനുള്ള തീരുമാനം എല്‍ഡിഎഫിന്റേതാണെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്‍ തിരിച്ചടിച്ചു. എംവി ശ്രേയാംസ് കുമാറിന് മറുപടി നല്‍കാനില്ലെന്ന് പറഞ്ഞ അദ്ദേഹം രാജ്യസഭാ സീറ്റുമായി ബന്ധപ്പെട്ട വിഷയങ്ങള്‍ അടഞ്ഞ അധ്യായമാണെന്നും പറഞ്ഞു. ഇനി ഇക്കാര്യത്തില്‍ പ്രതികരിക്കാനില്ല. സില്‍വര്‍ ലൈന്‍ നിയമത്തിന്റെ വഴിക്ക് പോകും. പ്രതിപക്ഷം ബിജെപിയുമായി അടുക്കാന്‍ വേണ്ടി സില്‍വര്‍ ലൈനിനെ ഉപയോഗിക്കുകയാണെന്നും അദ്ദേഹം കുറ്റപ്പെടുത്തി.