തിരഞ്ഞെടുപ്പിന് പിന്നാലെ വീണ്ടും ഇരുട്ടടി; പാചകവാതക വില കൂട്ടി, അടുക്കള പൊള്ളും

ഇന്ധന വിലവര്‍ധനയ്ക്കു പിന്നാലെ ജനങ്ങള്‍ക്ക് ഇരുട്ടടിയായി രാജ്യത്തു പാചകവാതക വിലയും കൂട്ടി. ഗാര്‍ഹിക സിലിണ്ടറിന് 50 രൂപയാണു കൂട്ടിയത്. കൊച്ചിയിലെ വില 956 രൂപയായി. അതേസമയം, വാണിജ്യ സിലിണ്ടറിന് എട്ടുരൂപ കുറച്ചിട്ടുണ്ട്. നാലു മാസത്തിനു ശേഷം ഇന്ത്യയില്‍ പെട്രോള്‍-ഡീസല്‍ വില കൂട്ടിയിരുന്നു. അഞ്ചു സംസ്ഥാനങ്ങളിലെ തിരഞ്ഞെടുപ്പിനു പിന്നാലെയാണു വില കൂട്ടിയത്. പെട്രോള്‍ ലീറ്ററിന് കൂട്ടിയത് 87 പൈസ. ഡീസല്‍ ലീറ്ററിന് 85 പൈസയും കൂട്ടി. 2021 നവംബറിലായിരുന്നു രാജ്യത്ത് അവസാനമായി ഇന്ധന വിലയില്‍ വര്‍ധന വരുത്തിയത്. നിലവില്‍, കൊച്ചിയില്‍ പെട്രോള്‍ വില 104.31 ആയിരുന്നത് 87 പൈസ വര്‍ധിച്ച് 105.18ലെത്തി. ഡീസലിന് 91.55 രൂപയായിരുന്നത് 85 പൈസ വര്‍ധിച്ച് 92.40 രൂപയായി.