സിപിഎം പാര്‍ട്ടി കോണ്‍ഗ്രസിനോട് അനുബന്ധിച്ച് 2000 പൊലീസുകാരെ വിന്യസിക്കും

കണ്ണൂര്‍: സിപിഎം പാര്‍ട്ടി കോണ്‍ഗ്രസിനോടനുബന്ധിച്ച് കണ്ണൂരില്‍ രണ്ടായിരത്തോളം പൊലീസിനെ വിന്യസിക്കും. സിപിഎം പാര്‍ട്ടി കോണ്‍ഗ്രസിന്റെ സുരക്ഷാ ചുമതലക്ക് മൂന്ന് എസ്പിമാരെ നിയോഗിക്കും. പാര്‍ട്ടി കോണ്‍ഗ്രസിനായി മൂന്നുമുതല്‍ സിപിഎമ്മിന്റെ ദേശീയ നേതാക്കള്‍ ഉള്‍പ്പെടെയുള്ളവര്‍ കണ്ണൂരില്‍ എത്തി തുടങ്ങും. ഇവര്‍ താമസിക്കുന്ന സ്ഥലങ്ങളിലും പ്രത്യേക സുരക്ഷയാണ് ഒരുക്കുന്നത്. ഗതാഗതം നിയന്ത്രിക്കുന്നതിനായി ഒരു എസ്പിയേയും സുരക്ഷാ ചുമതലക്ക് രണ്ട് എസ്പിമാരെയുമാണ് നിയമിക്കുന്നത്. ഇവരുടെ നേതൃത്വത്തില്‍ 2001 പൊലീസുകാര്‍ പാര്‍ട്ടി കോണ്‍ഗ്രസ് നടക്കുന്ന സ്ഥലങ്ങളില്‍ നിലയുറപ്പിക്കും. കൂടാതെ, ആന്റി മാവോയിസ്റ്റ് സ്‌ക്വാഡിനെയും കെഎപി ബറ്റാലിയന്‍ പൊലീസ് സേനയേയും വിന്യസിക്കും. ഫുഡ് ആന്‍ഡ് സേഫ്റ്റി, പിഡബ്ല്യൂഡി തുടങ്ങിയവര്‍ക്കും പൊലീസ് പ്രത്യേക നിര്‍ദേശം കൊടുത്തിട്ടുണ്ട്. കെ.റെയില്‍ പ്രതിഷേധം കത്തി നില്‍ക്കുന്ന സാഹചര്യത്തില്‍ പ്രതിഷേധ പരിപാടികളുടെ സാധ്യത കണക്കിലെടുത്ത് മുഖ്യമന്ത്രി പിണറായി വിജയന് കര്‍ശന സുരക്ഷയൊരുക്കുന്നുണ്ട്.