കേരളത്തില്‍ ലക്ഷ്യമിട്ടത് 50 ലക്ഷം അംഗങ്ങളെ ചേര്‍ക്കല്‍; പകുതി പോലും ആയില്ല, കെപിസിസിക്ക് വീഴ്ച

തിരുവനന്തപുരം: പാര്‍ട്ടി അംഗത്വ വിതരണത്തില്‍ സംസ്ഥാനത്തെ കോണ്‍ഗ്രസ് നേതൃത്വത്തിന് വന്‍ വീഴ്ച. ലക്ഷ്യമിട്ട അംഗങ്ങളുടെ എണ്ണത്തില്‍ പകുതി പോലും പൂര്‍ത്തീകരിക്കാന്‍ കെപിസിസിക്കും ബന്ധപ്പെട്ട കമ്മിറ്റികള്‍ക്കും ആയില്ല. ഡിജിറ്റല്‍ - പേപ്പര്‍ ക്യാമ്പയിന്‍ വെള്ളിയാഴ്ചയോടെ പൂര്‍ത്തിയാകുകയും ചെയ്തു. ദേശീയ പുനഃസംഘടനയുടെ ഭാഗമായിട്ടാണ് രാജ്യവ്യാപകമായിട്ടും കേരളത്തിലും അംഗത്വ വിതരണം നടത്തുന്നത്. കഴിഞ്ഞ വര്‍ഷം നവംബറില്‍ കോണ്‍ഗ്രസിന്റെ അംഗത്വ വിതരണ ക്യാമ്പയിന്‍ ആരംഭിച്ചത്. മാര്‍ച്ച് 31-നായിരുന്നു ക്യാമ്പയിന്‍ പൂര്‍ത്തീകരിക്കാന്‍ തീരുമാനിച്ചിരുന്ന കാലപരിധി. എന്നാല്‍ സംസ്ഥാനത്ത് ലക്ഷ്യമിട്ടതിന്റെ നാലിലൊന്ന് പോലും ചേര്‍ക്കാന്‍ മാര്‍ച്ച് 31-നുള്ളില്‍ സാധിച്ചില്ല. ഇതേത്തുടര്‍ന്ന് 15 ദിവസം കൂടി നീട്ടി. ഏപ്രില്‍ 15 വരെ കെപിസിസി നീട്ടിയ അംഗത്വ വിതരണം ഇന്നലെ രാത്രിയോടെ അവസാനിച്ചപ്പോഴും ലക്ഷ്യമിട്ട പകുതി പോലും ആയിട്ടില്ല എന്നതാണ് പുറത്ത് വരുന്ന കണക്കുകള്‍. കോവിഡിന്റെ പശ്ചാത്തലത്തിലാണ് ഡിജിറ്റല്‍ അംഗത്വവിതരണം കൂടി നടത്തിയത്. ബൂത്ത് തലത്തിലാണ് പേപ്പര്‍ അംഗത്വ വിതരണം നടത്തിയത്.സെമി കേഡര്‍ നടപ്പാക്കിയിട്ടും മുന്‍ കെപിസിസി നേതൃത്വങ്ങള്‍ കൈവരിച്ച നേട്ടം പോലും സുധാകരന് നേടാനായിട്ടില്ലെന്നാണ് ഗ്രൂപ്പ് നേതാക്കള്‍ ആരോപിക്കുന്നത്.