കശ്മീരില്‍ ടിവി, ടിക് ടോക് താരത്തെ വധിച്ച ഭീകരരെ ഏറ്റുമുട്ടലില്‍ കൊലപ്പെടുത്തി പൊലീസ്

കശ്മീരിലെ ടിവി, ടിക് ടോക് താരം അമ്രീന്‍ ബട്ടിനെ (35) വധിച്ച ഭീകരരെ ഏറ്റുമുട്ടലില്‍ കൊലപ്പെടുത്തിയെന്നു ജമ്മു കശ്മീര്‍ പൊലീസ് അറിയിച്ചു. ബുധനാഴ്ചയാണു ലഷ്‌കറെ തയിബ ഭീകരരുടെ വെടിയേറ്റ് അമ്രീന്‍ മരിച്ചത്. ഒപ്പമുണ്ടായിരുന്ന ബന്ധുവായ 10 വയസ്സുകാരനു പരുക്കേറ്റിരുന്നു. അമ്രീന്‍ ബട്ടിന്റെ ഘാതകരായ രണ്ടു ലഷ്‌കറെ തയിബ ഭീകരരെ ഏറ്റുമുട്ടലില്‍ വധിച്ചെന്ന് ഐജി വിജയ് കുമാര്‍ പറഞ്ഞു. പുല്‍വാമ ജില്ലയിലെ അവന്തിപ്പോറയില്‍ ഏറ്റുമുട്ടല്‍ നടന്നതായി പൊലീസ് വക്താവ് നേരത്തേ അറിയിച്ചിരുന്നു. കൂടുതല്‍ വിവരങ്ങള്‍ പൊലീസ് വെളിപ്പെടുത്തിയില്ല. ബദ്ഗാം ജില്ലയിലെ ഹിഷ്രൂവിലുള്ള അമ്രീന്റെ വീട്ടില്‍ ചിത്രീകരണത്തിന്റെ ആവശ്യത്തിനെന്നു പറഞ്ഞ് ബുധനാഴ്ച രാത്രിയെത്തിയ രണ്ടംഗസംഘമാണു നടിയെ വെടിവച്ചു കൊന്നത്. ഒപ്പമുണ്ടായിരുന്ന അനന്തരവന്‍ ഫര്‍ഹാന്‍ സുബായിയുടെ കയ്യില്‍ വെടിയേറ്റു. രാത്രി 8 മണിയോടെയായിരുന്നു സംഭവം. ആശുപത്രിയില്‍ എത്തിക്കുന്നതിനു മുന്‍പേ അമ്രീന്‍ മരിച്ചു. ലഫ്റ്റനന്റ് ഗവര്‍ണര്‍ മനോജ് സിന്‍ഹ, കശ്മീര്‍ മുന്‍ മുഖ്യമന്ത്രിയും നാഷനല്‍ കോണ്‍ഫറന്‍സ് നേതാവുമായ ഒമര്‍ അബ്ദുല്ല തുടങ്ങിയവര്‍ അനുശോചിച്ചു. ഇതിനിടെ, കുപ്വാര ജില്ലയിലെ ജുംനാഗഡ് മേഖലയില്‍ നുഴഞ്ഞുകയറാനുള്ള ഭീകരരുടെ ശ്രമം രഹസ്യവിവരം ലഭിച്ചതനുസരിച്ചു സുരക്ഷാസേന തകര്‍ത്തു. ഭീകരരില്‍നിന്ന് വെടിക്കോപ്പുകളും ആയുധങ്ങളും പിടിച്ചെടുത്തു. കഴിഞ്ഞ ഏപ്രില്‍ 22ന് പുല്‍വാമയില്‍ സന്‍ജ്വാനില്‍ സിഐഎസ്എഫ് സൈനികര്‍ സഞ്ചരിച്ച ബസില്‍ ചാവേര്‍ ആക്രമണം നടത്തിയ സംഭവത്തിന്റെ സൂത്രധാരനെന്നു കരുതുന്ന ലഷ്‌കറെ പ്രവര്‍ത്തകന്‍ ആബിദ് അഹമ്മദിനെ ദേശീയ അന്വേഷണ ഏജന്‍സി (എന്‍ഐഎ) കസ്റ്റഡിയിലെടുത്തു.