പെണ്‍ ഭ്രൂണഹത്യ നടത്തുന്ന സംഘം പിടിയില്‍

പെണ്‍ ഭ്രൂണഹത്യ നടത്തുന്ന സംഘം പിടിയില്‍. 13 പേരടങ്ങിയ സംഘമാണ് ഒഡീഷയിലെ ബെര്‍ഹാംപൂരില്‍ നിന്ന് പിടിയിലായത്. അന്തര്‍ സംസ്ഥാന അള്‍ട്രാ സൗണ്ട് റാക്കറ്റ് സംഘത്തിലെ അംഗങ്ങളാണ് ഇവര്‍. ഇവരില്‍ നിന്ന് രണ്ട് അള്‍ട്രാസൗണ്ട് മെഷീനുകളും 18,200 രൂപയും കണ്ടെടുത്തു. ഒരു വീട്ടില്‍ തന്നെ സജ്ജീകരിച്ച ക്ലിനിക്കിലാണ് സംഘം പ്രവര്‍ത്തനം നടത്തിവന്നിരുന്നത്. 11 ഗര്‍ഭിണികള്‍ ഇവിടെ ഉണ്ടായിരുന്നു. വീട്ടുടമ അടക്കമുള്ള പ്രതികളെ കോടതിയില്‍ ഹാജരാക്കി. കഴിഞ്ഞ രണ്ട്, മൂന്ന് വര്‍ഷമായി ഈ ക്ലിനിക്ക് പ്രവര്‍ത്തിക്കുന്നുണ്ടെന്നും 7,000 മുതല്‍ 15,000 രൂപ വരെ ഈടാക്കാറുണ്ടായിരുന്നു എന്നും പൊലീസ് പറഞ്ഞു. 2005ല്‍ രാജ്യം നിരോധിച്ച പോര്‍ട്ടബിള്‍ അള്‍ട്രാ സൗണ്ട് യന്ത്രവും ഇവിടെ നിന്ന് കണ്ടെടുത്തു. ലിംഗ നിര്‍ണയം നടത്തി ഗര്‍ഭഛിദ്രത്തിന് ഒത്താശ നല്‍കുകയായിരുന്നു സംഘം ചെയ്തുവന്നിരുന്നത്. ലാബ്-ആശുപത്രി ഉടമകള്‍ക്ക് ഇവരുമായി ബന്ധമുണ്ടെന്ന് പൊലീസ് അറിയിച്ചു.