‘ഹൃദ്രോഗത്തിന്റെ സൂചനകള്‍ ദഹനപ്രശ്‌നമായി എടുത്തിരിക്കാം’; മുറിയില്‍നിന്ന് ഗുളികള്‍ കണ്ടെടുത്തു

കൊല്‍ക്കത്ത ന്മ പ്രശസ്ത ഗായകന്‍ കെകെയുടെ (കൃഷ്ണകുമാര്‍ കുന്നത്ത്-53) ഹൃദയധമനിയില്‍ ബ്ലോക്കുകള്‍ ഉണ്ടായിരുന്നെന്നും വീണയുടന്‍ തന്നെ സിപിആര്‍ (പുനരുജ്ജീവന പ്രക്രിയ) ചെയ്തിരുന്നെങ്കില്‍ രക്ഷിക്കാനായേനേ എന്നും പോസ്റ്റ്‌മോര്‍ട്ടം സംഘത്തിലുണ്ടായിരുന്ന ഡോക്ടര്‍ പറഞ്ഞു. ഇടതുവശത്തെ ധമനിയില്‍ 80% ഉള്ള ഗുരുതരമായ ബ്ലോക്ക് രക്തയോട്ടത്തെ ബാധിച്ചിരുന്നു. മറ്റിടങ്ങളില്‍ ചെറിയ ബ്ലോക്കുകളും ഉണ്ടായിരുന്നു. ലൈവ് ഷോയിലെ ആവേശവും നൃത്തവും കൂടിയായപ്പോള്‍ രക്തയോട്ടത്തെ കൂടുതല്‍ ബാധിച്ച് ഹൃദയസ്തംഭനത്തിനു കാരണമായിട്ടുണ്ടാകാം. ദീര്‍ഘകാലത്തെ ഹൃദയസംബന്ധമായ പ്രശ്‌നങ്ങള്‍ ചികിത്സിച്ചിട്ടില്ലെന്നാണു കരുതേണ്ടത്. ഹൃദ്രോഗവുമായി ബന്ധപ്പെട്ട സൂചനകള്‍ ദഹനപ്രശ്‌നമായി കെകെ എടുത്തിരിക്കാമെന്നും ഡോക്ടര്‍ ചൂണ്ടിക്കാട്ടി. അദ്ദേഹം വയറെരിച്ചിലിനുള്ള മരുന്ന് സ്ഥിരമായി കഴിച്ചിരുന്നുവെന്ന് ഭാര്യ അറിയിച്ചതായി പൊലീസും പറഞ്ഞു. മുറിയില്‍ നിന്ന് ഇത്തരം ഗുളികകള്‍ കണ്ടെടുത്തിരുന്നു. ഹൃദയാഘാതം സംഭവിക്കുന്ന വ്യക്തികള്‍ക്ക് അടിയന്തരമായി നല്‍കുന്ന ശുശ്രൂഷയാണു സിപിആര്‍ (കാര്‍ഡിയോ പള്‍മനറി റിസസിറ്റേഷന്‍). ശാസ്ത്രീയ രീതിയില്‍ നെഞ്ചില്‍ ശക്തിയായി അമര്‍ത്തുന്നതും വായിലൂടെ കൃത്രിമ ശ്വാസം നല്‍കുന്നതും ഇതിന്റെ ഭാഗമാണ്. സംസ്‌കാരം നടത്തി മുംബൈ ന്മ ഉയിരിന്‍ ഉയിരായ സ്വരം ബാക്കി വച്ച് കെകെ യാത്രയായി. അകാലത്തില്‍ പൊലിഞ്ഞ നക്ഷത്രം ഇനി ഗാനവീചികളായി ജീവിക്കും. മുംബൈ വെര്‍സോവ ഹിന്ദു ശ്മശാനത്തില്‍ മകന്‍ നകുലാണു ചിതയ്ക്കു തീകൊളുത്തിയത്. കെകെയുടെ ഭാര്യ ജ്യോതി കൃഷ്ണയും മകള്‍ താമരയും ബന്ധുക്കളും നിറകണ്ണുകളോടെ ഒപ്പമുണ്ടായിരുന്നു. അല്‍ക യാഗ്‌നിക്, ശ്രേയ ഘോഷല്‍, ഹരിഹരന്‍, ശങ്കര്‍ മഹാദേവന്‍ തുടങ്ങി ഒട്ടേറെ പ്രമുഖ സംഗീതജ്ഞരും ബോളിവുഡ് നടീനടന്മാരും അന്ത്യാഞ്ജലി അര്‍പ്പിക്കാനെത്തി.