പശുവിന് സുഖമില്ലെന്ന് പറഞ്ഞ് മൃഗഡോക്ടറെ വിളിച്ച് വരുത്തി; പെണ്‍കുട്ടിയുമായി നിര്‍ബന്ധിച്ച് വിവാഹം കഴിപ്പിച്ചു

ബിഹാര്‍ ബാഗുസരായി ജില്ലയില്‍ മൃഗഡോക്ടറെ തട്ടിക്കൊണ്ടുപോയി വിവാഹം കഴിപ്പിച്ചു. ഡോക്ടര്‍ സത്യം കുമാര്‍ ഝായെയാണ് തട്ടിക്കൊണ്ടുപോയി വിവാഹം കഴിപ്പിച്ചത്. പശുവിന് സുഖമില്ലെന്ന് പറഞ്ഞ് ഡോ സത്യം കുമാറിനെ തന്ത്രപൂര്‍വം വിളിച്ചുവരുത്തുകയായിരുന്നു. തുടര്‍ന്ന് ഒരു പെണ്‍കുട്ടിയുമായി നിര്‍ബന്ധപൂര്‍വം വിവാഹം കഴിപ്പിക്കുകയായിരുന്നു. ഏറെ വൈകിയും സത്യം കുമാര്‍ വീടെത്താത്തതിനെ തുടര്‍ന്ന് കുടുംബം അന്വേഷിച്ച് ഇറങ്ങുകയായിരുന്നു. തൊട്ടടുത്ത ദിവസം രാവിലെ സത്യം കുമാറിന്റെ വിവാഹ വിഡിയോ കുടുംബത്തിന് ലഭിച്ചപ്പോഴാണ് ഡോക്ടറുടെ തിരോധാനത്തിന് പിന്നിലെ സത്യം കുടുംബം അറിയുന്നത്. തുടര്‍ന്ന് കുടുംബം ടേഗ്ര പൊലീസ് സ്റ്റേഷനില്‍ പരാതി നല്‍കി. പൊലീസ് അന്വേഷണം പുരോഗമിക്കുകയാണ്.ഇത്തരമൊരു സംഭവം വിചിത്രമാണെന്ന് നമുക്ക് തോന്നുമെങ്കിലും ബിഹാറില്‍ ഇത് സാധാരണമാണ്. ഇങ്ങനെയുള്ള വിവാഹങ്ങളെ പകഡ്വാ വിവാഹ് എന്നാണ് പറയപ്പെടുന്നത്. ലാഖിസാരൈ, ജാമുവി, മുംഗര്‍, പാട്ന, ബെഗുസരായ്, നളന്ദ, ഭഗല്‍പുര്‍, എന്നീ പ്രദേശങ്ങളില്‍ ഇത്തരം വിവാഹങ്ങള്‍ സാധാരണമാണ്. പുരുഷന്മാരെ തട്ടിക്കൊണ്ടുപോയി കുടുംബത്തിലെ പെണ്‍കുട്ടിയുമായി വിവാഹം കഴിപ്പിക്കുന്നതാണ് രീതി.2018 ല്‍ ബൊകാരോ സ്റ്റില്‍ പ്ലാന്റഇലെ ജൂനിയര്‍ മാനേജരെ ഇത്തരത്തില്‍ തട്ടിക്കൊണ്ടുപോയി വിവാഹം കഴിപ്പിച്ചത് വലിയ വാര്‍ത്തയായിരുന്നു.