പുല്‍വാമയില്‍ പൊലീസുകാരനെ ഭീകരര്‍ വെടിവച്ചു കൊന്നു

ജമ്മു കശ്മീരില്‍ ടാര്‍ഗെറ്റ് കില്ലിംഗിനെക്കുറിച്ചുള്ള ആശങ്ക വര്‍ധിക്കുന്നു. പുല്‍വാമയില്‍ ഭീകരര്‍ പൊലീസുകാരനെ വെടിവച്ചു കൊന്നു. പാംപോര്‍ സബ് ഇന്‍സ്പെക്ടര്‍ ഫാറൂഖ് അഹമ്മദ് മീറാണ് കൊല്ലപ്പെട്ടത്. എസ്‌ഐയെ വീട്ടില്‍ നിന്നും തട്ടിക്കൊണ്ടുപോയി സമീപത്തെ പറമ്പില്‍ വച്ച് കൊന്നതായാണ് വിവരം. സംഭവ സ്ഥലത്ത് നിന്ന് രണ്ട് പിസ്റ്റള്‍ കാട്രിഡ്ജുകളും കണ്ടെടുത്തു. എസ്‌ഐയുടെ മൃതദേഹം സമ്ബൂരിലെ നെല്‍വയലില്‍ നിന്നും കണ്ടെത്തുകയായിരുന്നു. രണ്ടോ മൂന്നോ ഭീകരര്‍ ചേര്‍ന്നാണ് കൊല നടത്തിയതെന്നാണ് വിവരം. സംഭവത്തിന് പിന്നില്‍ ഏത് സംഘടനയാണെന്ന് ഇതുവരെ അറിവായിട്ടില്ല. സംഭവത്തെത്തുടര്‍ന്ന് സുരക്ഷാസേന പ്രദേശമാകെ തെരച്ചില്‍ ആരംഭിച്ചിട്ടുണ്ട്. പാംപോറയിലെ ലെത്ത്പെരയിലെ 23 ബറ്റാലിയന്‍ ഐആര്‍പിയിലാണ് അദ്ദേഹത്തെ നിയമിച്ചിരുന്നത്. അച്ഛനും ഭാര്യയും മൂന്ന് കുട്ടികളും അടങ്ങുന്നതാണ് ഫാറൂഖ് അഹമ്മദ് മിറിന്റെ കുടുംബം. ഇവരില്‍ രണ്ട് പെണ്‍മക്കളും ഒരു മകനും ഉള്‍പ്പെടുന്നു. കഴിഞ്ഞ കുറേ മാസങ്ങളായി ജമ്മു കശ്മീരില്‍ ടാര്‍ഗെറ്റ് കില്ലിംഗ് നടന്നുകൊണ്ടിരിക്കുകയാണ്. കഴിഞ്ഞ ദിവസം കുല്‍ഗാമില്‍ രണ്ട് ഭീകരരെ സുരക്ഷാസേന വധിച്ചിരുന്നു. ഭീകര സംഘടനയായ ലഷ്‌കര്‍ ഇ തൊയ്ബയുമായി ബന്ധമുള്ളവരാണ് ഇരുവരും.