ലഖിംപൂരില്‍ കൗമാരക്കാരിയെ ബലാത്സംഗം ചെയ്ത് കൊലപ്പെടുത്തി

ഉത്തര്‍പ്രദേശിലെ ലഖിംപൂര്‍ ഖേരിയില്‍ പ്രായപൂര്‍ത്തിയാകാത്ത പെണ്‍കുട്ടിയുടെ മൃതദേഹം കരിമ്പ് തോട്ടത്തില്‍ കണ്ടെത്തി. ആട് മേയ്ക്കാന്‍ എത്തിയ കുട്ടികളാണ് വിവരം മറ്റുള്ളവരെ അറിയിച്ചത്. ബലാത്സംഗത്തിന് ശേഷം സ്‌കാര്‍ഫ് ഉപയോഗിച്ച് കഴുത്ത് ഞെരിച്ച് കൊന്നതാണെന്ന് പൊലീസ് സ്ഥിരീകരിച്ചു. സ്ഥലം സീല്‍ ചെയ്ത പൊലീസ് അന്വേഷണം ആരംഭിച്ചിട്ടുണ്ട്. ചൊവ്വാഴ്ച സദര്‍ കോട്വാലി പ്രദേശത്തെ കരിമ്പ് തോട്ടത്തില്‍ നിന്നുമാണ് 13 കാരിയുടെ മൃതദേഹം കണ്ടെത്തിയത്. മൃതദേഹത്തില്‍ കഴുത്ത് ഞെരിച്ചതിന്റെ പാടുകളുണ്ട്. വസ്ത്രങ്ങള്‍ അലങ്കോലമായിരുന്നു. പെണ്‍കുട്ടിയുടെ കണ്ണുകള്‍ക്ക് സമീപം മുറിവുകള്‍ ഉള്ളതായും കണ്ടെത്തി. വിവരമറിഞ്ഞ് എസ്പി സഞ്ജീവ് സുമന്‍ സേനയും ഐജി ലക്ഷ്മി സിംഗും ക്രൈംബ്രാഞ്ച് സംഘവും വിരലടയാള വിദഗ്ധരും സ്ഥലത്തെത്തി. ഡോക്ടര്‍മാരുടെ സമിതിയുടെ മേല്‍നോട്ടത്തില്‍ വീഡിയോഗ്രാഫിയുടെ മേല്‍നോട്ടത്തിലാണ് പോസ്റ്റ്മോര്‍ട്ടം ചെയ്യുന്നതെന്ന് എസ്പി സഞ്ജീവ് സുമന്‍ പറഞ്ഞു. പോസ്റ്റ്മോര്‍ട്ടം റിപ്പോര്‍ട്ട് വന്നാല്‍ മാത്രമേ വ്യക്തമായി പറയാന്‍ കഴിയൂ സംഭവം അന്വേഷിക്കാന്‍ സംഘങ്ങളെ വിന്യസിച്ചിട്ടുണ്ട്. അതേസമയം മൃതദേഹം ഏറ്റുവാങ്ങുന്നതിനിടെ ഗ്രാമവാസികള്‍ ബഹളം വച്ചു. പൊലീസ് മെല്ലെപ്പോക്ക് നടപടി സ്വീകരിക്കുകയാണെന്ന് നാട്ടുകാര്‍ ആരോപിച്ചു.