കുടുംബ കോടതിയില്‍ വച്ച് ഭാര്യയുടെ കഴുത്തറുത്ത് ഭര്‍ത്താവ്

കര്‍ണാടകയിലെ കുടുംബ കോടതിയില്‍ വച്ച് ഭാര്യയുടെ കഴുത്തറുത്ത് ഭര്‍ത്താവ്. വിവാഹമോചനത്തിന് അപേക്ഷ സമര്‍പ്പിച്ചതിന് പിന്നാലെയുള്ള കൗണ്‍സിലിംഗ് സെഷണിനിടെയാണ് പ്രകോപിതനായ ഭര്‍ത്താവ് ഭാര്യയുടെ കഴുത്തറുത്തത്. കൃത്യം നടത്തിയതിന് ശേഷം കോടതിയില്‍ നിന്ന് രക്ഷപ്പെടാന്‍ ശ്രമിച്ചുവെങ്കിലും ചുറ്റുമുള്ളവര്‍ ചേര്‍ന്ന് പിടികൂടി പൊലീസില്‍ ഏല്‍പ്പിക്കുകയായിരുന്നു. കര്‍ണാടക ഹസന്‍ ജില്ലയിലെ ഹൊലേനരാസിപുര കുടുംബ കോടതിയിലാണ് സംഭവം നടന്നത്. അഭിപ്രായ വ്യത്യാസങ്ങള്‍ മാറ്റിവച്ച് ഒന്നിച്ച മുന്നോട്ടുപോകാമെന്ന് രണ്ട് പേരും സമ്മതിച്ച് വെറും മിനിറ്റുകള്‍ക്ക് ശേഷമാണ് ശിവകുമാര്‍ ഭാര്യ ചൈത്രയെ ക്രൂരമായി കൊലപ്പെടുത്തുന്നത്. കോടതിയില്‍ നിന്നിറങ്ങിയ ചൈത്ര ബാത്രൂമില്‍ പോകുന്നതിനിടെ അവരെ പിന്തുടര്‍ന്നാണ് ശിവകുമാര്‍ പിന്നില്‍ നിന്ന് കഴുത്തറുത്തത്. ഉടന്‍ തന്നെ ചുറ്റുമുള്ളവര്‍ ശിവകുമാറിനെ തടഞ്ഞ് വയ്ക്കുകയും ചൈത്രയെ ആശുപത്രിയിലേക്ക് കൊണ്ടുപോവുകയും ചെയ്തുവെങ്കിലും മുറിവ് ആഴത്തിലുള്ളതായതുകൊണ്ടും ഒരുപാട് രക്തം നഷ്ടപ്പെട്ടിരുന്നതുകൊണ്ടും ചൈത്രയുടെ ജീവന്‍ രക്ഷിക്കാന്‍ സാധിച്ചില്ല. ശിവകുമാറിനെതിരെ പൊലീസ് കൊലക്കുറ്റം ചുമത്തി കേസെടുത്തിട്ടുണ്ട്. കോടതി വളപ്പില്‍ എങ്ങനെയാണ് ശിവകുമാര്‍ ആയുധവുമായി പ്രവേശിച്ചതെന്നതിനെ കുറിച്ചും പൊലീസ് അന്വേഷിച്ചുവരികയാണ്.