അരിയും നാരങ്ങയും തിന്നു മുഖം ചുവന്നു; മോഷണം ആരോപിച്ച് സ്ത്രീയെ വിവസ്ത്രയാക്കി മര്‍ദിച്ചു

ന്യൂഡല്‍ഹി: തെക്കന്‍ ഡല്‍ഹിയിലെ സത്ബാരിയില്‍ മോഷണക്കുറ്റം ആരോപിച്ചു വീട്ടുജോലിക്കാരിയെ വിവസ്ത്രയാക്കുകയും ക്രൂരമായി മര്‍ദിക്കുകയും ബന്ദിയാക്കുകയും ചെയ്ത കുടുംബത്തിനെതിരെ പൊലീസ് കേസെടുത്തു. പത്ത് മാസം മുന്‍പ് ഇവരുടെ വീട്ടില്‍ നടന്ന മോഷണത്തിനു പിന്നിലെ പ്രതികളെ കണ്ടെത്താന്‍ കുടുംബം ഒരു മന്ത്രവാദിയുടെ സഹായം തേടിയിരുന്നു. ഇതുമായി ബന്ധപ്പെട്ട് കഴിഞ്ഞ ഈ മാസം ഒന്‍പതിന് ഇവരുടെ വീട്ടില്‍ ആഭിചാരക്രിയകളും നടന്നിരുന്നു. സത്ബാരിയിലെ അന്‍സല്‍ വില്ലയിലുള്ള ആഡംബര ഫാം ഹൗസില്‍ വീട്ടുജോലിക്കുനിന്ന 43 വയസ്സുകാരിയാണ് ക്രൂരമായ മര്‍ദനത്തിനും അതിക്രമത്തിനും ഇരയായത്. ആഭിചാര കര്‍മങ്ങള്‍ക്കുശേഷം ജോലിക്കാര്‍ക്കെല്ലാം മന്ത്രവാദി അരിയും നാരങ്ങയും തിന്നാന്‍ കൊടുത്തു. അരിയും നാരങ്ങയും തിന്നതിനുശേഷം ആരുടെയെങ്കിലും വായ ചുവന്ന നിറമായാല്‍ അവരാകും മോഷ്ടാവ് എന്നു മന്ത്രവാദി പറയുകയും ചെയ്തു. അരിയും നാരങ്ങയും തിന്നതിനു തൊട്ടുപിന്നാലെ യുവതിയുടെ മുഖം ചുവന്നതോടെ വീട്ടുടമ സ്ത്രീയെ ക്രൂരമായി മര്‍ദിക്കാന്‍ തുടങ്ങി. മറ്റു വീട്ടുജോലിക്കാര്‍ നോക്കിനില്‍ക്കെ അതിജീവിതയെ വിവസ്ത്രയാക്കുകയും മുറിയില്‍ 24 മണിക്കൂറോളം ബന്ദിയാക്കുകയും ചെയ്തു. ഓഗസ്റ്റ് പത്തിനു പ്രാഥമികാവശ്യങ്ങള്‍ നിര്‍വഹിക്കുന്നതിനായി യുവതി അക്രമിയുടെ അനുവാദം തേടുകയും അപമാനം സഹിക്കാന്‍ വയ്യാതെ ശുചിമുറിയില്‍ വച്ച് വിഷം കഴിക്കുകയും ചെയ്തു. സ്ത്രീയുടെ നില ഗുരുതരമായതോടെ അക്രമികള്‍ അവരെ ആശുപത്രിയില്‍ എത്തിക്കുകയായിരുന്നു. ഓഗസ്റ്റ് പതിനൊന്നിന് സ്ത്രീയുടെ പരാതിയില്‍ കേസെടുത്തതായി മൈദന്‍ഗര്‍ഹി പൊലീസ് അറിയിച്ചു.