‘പറഞ്ഞ വാക്ക് പാലിക്കും; പിണറായി വിജയന്‍ കാര്യക്ഷമതയുള്ള ആള്‍’; ശശി തരൂര്‍

മുഖ്യമന്ത്രി പിണറായി വിജയനെ പ്രശംസിച്ച് കോണ്‍ഗ്രസ് എം പി ശശി തരൂര്‍. പിണറായി വിജയന്‍ വളരെ കാര്യഗൗരവവും കാര്യക്ഷമതയും ഉള്ള വ്യക്തിയാണെന്ന് ശശി തരൂര്‍ വ്യക്തമാക്കി. ഒരു ദേശീയ മാധ്യമത്തിന് നല്‍കിയ അഭിമുഖത്തിലാണ് തരൂര്‍ ഇക്കാര്യം പറഞ്ഞത്. മുഖ്യമന്ത്രി പിണറായി വിജയനുമായി നല്ല ബന്ധം ഉണ്ട്. അദ്ദേഹവുമായി ഞാന്‍ ഇടപെട്ടിട്ടുള്ള പ്രശ്‌നങ്ങളെല്ലാം വളരെ ബുദ്ധിപൂര്‍വം കൈകാര്യം ചെയ്തിട്ടുണ്ട്. അദ്ദേഹം ഒരു വാക്ക് നല്‍കിയിട്ടുണ്ടെങ്കില്‍ അത് പാലിച്ചിരിക്കും. എനിക്ക് അദ്ദേഹത്തോട് വലിയ ബഹുമാനമുണ്ടെന്നും അദ്ദേഹം പറഞ്ഞു. കോണ്‍ഗ്രസ് നേതാവ് ഉമ്മന്‍ ചാണ്ടിയോട് വലിയ ബഹുമാനം ഉണ്ടെന്ന് തരൂര്‍ പറഞ്ഞു. ജനങ്ങളുടെ സ്പന്ദനത്തില്‍ എപ്പോഴും വിരല്‍സ്പര്‍ശം നല്‍കുന്നയാളാണ് അദ്ദേഹം. കേരളത്തിലെ ജനങ്ങളുമായി ഉമ്മന്‍ ചാണ്ടിയോളം അടുപ്പം പുലര്‍ത്തുന്ന മറ്റൊരു നേതാവ് ഉണ്ടാകില്ല. എനിക്ക് അദ്ദേഹത്തെപ്പോലെ ആകാന്‍ സാധിക്കില്ല. മാതൃകാപരമായി കാര്യങ്ങള്‍ ചെയ്യുന്നവരെ ഞാന്‍ ബഹുമാനിക്കുന്നെന്നും തരൂര്‍ പറഞ്ഞു.