ഭര്‍ത്താവുമായി പിണങ്ങി യുവതി റെയില്‍വേ ട്രാക്കിലൂടെ നടന്നു; ട്രെയിന്‍ നിര്‍ത്തിച്ച് പോലീസ് രക്ഷപ്പെടുത്തി

തിരുവനന്തപുരം: ആത്മഹത്യ ചെയ്യുന്നതിനായി റെയില്‍വേ ട്രാക്കിലൂടെ നടന്ന യുവതിയെ പോലീസ് രക്ഷപ്പെടുത്തി. ഞായറാഴ്ച വൈകീട്ട് മൂന്നോടെ പേട്ട റെയില്‍വേ സ്റ്റേഷന്‍ പരിസരത്തുനിന്ന് മണ്ണന്തല സ്വദേശിയായ 27-കാരിയെയാണ് വഞ്ചിയൂര്‍ പോലീസ് രക്ഷിച്ചത്. ഭര്‍ത്താവുമായി പിണങ്ങി വീടുവിട്ടിറങ്ങിയ യുവതി പേട്ട റെയില്‍വേ സ്റ്റേഷനിലെത്തിയശേഷം റെയില്‍വേ ട്രാക്കിലിറങ്ങി തമ്പാനൂര്‍ ഭാഗത്തേക്ക് നടക്കുകയായിരുന്നു. ഇതുകണ്ട നാട്ടുകാര്‍ അറിയിച്ചതനുസരിച്ച് വഞ്ചിയൂര്‍ പോലീസ് സ്ഥലത്തെത്തി. പിന്നാലെ പോലീസ് വരുന്നതു കണ്ട യുവതി വേഗത്തില്‍ മുന്നോട്ട് ഓടി. ഈ സമയം തിരുവനന്തപുരം സെന്‍ട്രല്‍ സ്റ്റേഷനില്‍ നിന്നും തീവണ്ടി വരുന്നുണ്ടായിരുന്നു. യുവതിയെ പിടിച്ചുമാറ്റാനായി പിറകെ ഓടിയ പോലീസ് കൈയുയര്‍ത്തി തീവണ്ടി നിര്‍ത്താന്‍ ആവശ്യപ്പെട്ടു. ലോക്കോ പൈലറ്റ് ബ്രേക്കിട്ടതോടെ തീവണ്ടി യുവതിക്ക് അടുത്തെത്തിയപ്പോഴേക്കും നിന്നു. തുടര്‍ന്ന് പോലീസുകാര്‍ യുവതിയെ പോലീസ് സ്റ്റേഷനിലെത്തിച്ച് ഭര്‍ത്താവിനെയും ബന്ധുക്കളെയും വിളിച്ചുവരുത്തി വിട്ടയച്ചു. എസ്.ഐ. രാധാകൃഷ്ണന്‍, സി.പി.ഒ.മാരായ സുബിന്‍ പ്രസാദ്, ബിജു എന്നിവരാണ് സംഘത്തിലുണ്ടായിരുന്നത്.