തോക്ക് ചൂണ്ടി മോഷണം; മുഖ്യപ്രതി യുപി സ്വദേശി, ലുക്ക് ഔട്ട് നോട്ടിസ് ഇറക്കാന്‍ പൊലീസ്

തിരുവനന്തപുരം നഗരത്തില്‍ പട്ടാപ്പകല്‍ തോക്ക് ചൂണ്ടി മോഷണത്തിന് ശ്രമിച്ച ആളെ തിരിച്ചറിഞ്ഞു. മുഖ്യപ്രതി ഉത്തര്‍ പ്രദേശ് സ്വദേശി മോനിഷിനെ ആണ് പൊലീസ് തിരിച്ചറിഞ്ഞത്. മൂന്നു മാസമായി മോനിഷ് തമ്പാനൂരിലും വഞ്ചിയൂരിലും വാടകയ്ക്ക് താമസിക്കുകയായിരുന്നു. മോനിഷിനെ കണ്ടെത്താന്‍ പൊലീസ് ലുക് ഔട്ട് നോട്ടിസ് ഇന്നിറക്കും. കഴിഞ്ഞ ദിവസം പട്ടാപ്പകലാണ് ഒരു സ്‌കൂട്ടറില്‍ കറങ്ങി നടന്നത് രണ്ടുപേര്‍ നഗരത്തില്‍ ഭീതിപടര്‍ത്തിയത്. ഫോര്‍ട്ട് സ്റ്റേഷന്‍ പരിധിയിലെ ഒരു വീട്ടില്‍ നിന്നും അഞ്ചുപവനും പണവും മോഷണം നടത്തിയവര്‍ നേരെയെത്തിയത് ഇടപ്പഴഞ്ഞിയിലാണ്. ഇവിടെ ഒരു അധ്യാപികയുടെ വീട്ടിലെ മോഷണ ശ്രമം തടയാന്‍ ശ്രമിച്ചപ്പോള്‍ നാട്ടുകാരന് നേരെ മോഷ്ടാക്കള്‍ തോക്കുചൂണ്ടി രക്ഷപ്പെടുകയായിരുന്നു. മോഷ്ടാക്കളെ തടയാന്‍ ശ്രമിച്ച പൊലീസിന് നേരെയും തോക്കുചൂണ്ടി. മണിക്കൂറുകള്‍ പൊലീസിന്റെ മൂക്കിന് തുമ്പില്‍ തോക്കുമായി കറങ്ങി നടന്നവര്‍ പിഎംജി പൊലീസ് ക്വാര്‍ട്ടേഴ്‌സിന് സമീപം സ്‌കൂട്ടര്‍ ഉപേക്ഷിച്ച് കടന്നു കളഞ്ഞു. പൊലീസ് ന നഗരത്തിലെ എല്ലാ സ്റ്റേഷനുകളിലേക്കും ഉടന്‍ വിവരം ഉടന്‍ കൈമാറി. വഞ്ചിയൂര്‍ പുന്നപുരത്ത് വച്ച് മോഷ്ടാക്കള്‍ സ്‌പെയര്‍ പാര്‍ട്‌സ് കടയില്‍ കയറി. മോഷ്ടാക്കളെ ശ്രദ്ധിച്ച ഒരു പൊലീസുകാരന്‍ ഇവരെ തടയാന്‍ ശ്രമിച്ചപ്പോഴും തോക്കുചൂണ്ടുകയായിരുന്നു.