കൊല്ലത്ത് കുത്തിവയ്പ്പ് എടുത്ത 10 വയസ്സുകാരിക്ക് ശസ്ത്രക്രിയ വേണ്ടി വന്ന സംഭവം; പുതിയ അന്വേഷണ സംഘത്തെ നിയമിക്കുമെന്നും ആരോഗ്യ വകുപ്പ്

കൊല്ലം നെടുമ്പനയിലെ പ്രാഥമികാരോഗ്യ കേന്ദ്രത്തില്‍ കുത്തിവയ്പ്പ് എടുത്ത 10 വയസ്സുകാരിക്ക് ശസ്ത്രക്രിയ വേണ്ടി വന്ന സംഭവത്തില്‍ പുനരന്വേഷണം നടത്തും. കുറ്റാരോപിതരായ ആശുപത്രി ജീവനക്കാരെ വെള്ളപൂശുന്ന ഡിഎംഒ യുടെ റിപ്പോര്‍ട്ട് വിവാദമായ പിന്നാലെയാണ് നടപടി. പുതിയ അന്വേഷണ സംഘത്തെ നിയമിക്കുമെന്നും ആരോഗ്യ വകുപ്പിന്റെ ഉറപ്പ്. 24 ഇംപാക്ട് . ജൂലൈ മാസത്തിലാണ് വട്ടവിള ആരോഗ്യ കേന്ദ്രത്തില്‍ കുത്തിവയ്പ്പെടുത്ത കൊല്ലം പള്ളിമണ്‍ സ്വദേശികളായ അമീര്‍ഖാന്‍ - സുല്‍ഫത്ത് ദമ്പതികളുടെ മകള്‍ക്ക് ആരോഗ്യനില വഷളായത്. കുത്തിവെപ്പ് എടുത്ത പിറ്റേദിവസം ആ ഭാഗത്ത് വീക്കം ഉണ്ടാവുകയായിരുന്നു. പിന്നാലെ ആരോഗ്യനില വശളായ കുട്ടിയുടെ വീക്കം വന്ന ഭാഗത്തെ ദശ നീക്കം ചെയ്യേണ്ടി വന്നു. വിഷയത്തില്‍ ആരോഗ്യമന്ത്രിക്കും ഡിഎംഒയ്ക്കും ഉള്‍പ്പെടെ നല്‍കിയ പരാതിയെ തുടര്‍ന്ന് അന്വേഷണം പ്രഖ്യാപിച്ചിരുന്നു. ഈ അന്വേഷണത്തിലാണ് ഡിഎംഒ വിചിത്ര റിപ്പോര്‍ട്ട് തയ്യാറാക്കി നല്‍കിയിരിക്കുന്നത്. കുട്ടിക്കൊപ്പം ആശുപത്രിയിലായിരുന്നതിനാല്‍ മാതാവിന് മൊഴി നല്‍കാന്‍ കഴിഞ്ഞിരുന്നില്ല. ആശുപത്രിയില്‍ എത്തി ഉദ്യോഗസ്ഥര്‍ മൊഴി ശേഖരിച്ചതും ഇല്ല. കുറ്റാരോപിതരുടെ മൊഴി രഹസ്യമായി ശേഖരിച്ചപ്പോള്‍, പരാതിക്കാരെ കുറ്റാരോപിതര്‍ക്ക് ഒപ്പം ഇരുത്തിയായിരുന്നു മൊഴി രേഖപ്പെടുത്തിയത്. വീട്ടുകാരുടെ ആവശ്യപ്രകാരം സംഭവം അന്വേഷിക്കാന്‍ പുതിയ അന്വേഷണ സംഘത്തെ നിയോഗിക്കും. സെപ്റ്റംബര്‍ 15നകം അന്വേഷണം പൂര്‍ത്തിയാക്കുമെന്നും ആരോഗ്യവകുപ് അധികൃതര്‍ ഉറപ്പ് നല്‍കി. കുട്ടിയുടെ അമ്മയുടെയും കുട്ടിയുടെയും പുതിയ മൊഴിയും അന്വേഷണസംഘം രേഖപ്പെടുത്തും. പിതാവിന്റെ രഹസ്യ മൊഴിയും രേഖപ്പെടുത്തും. കൊല്ലം ജില്ല ആരോഗ്യ വകുപ്പ് അധികൃതരുടെ ഭാഗത്ത് നിന്ന് പുനരന്വേഷണം രേഖാമൂലം ഉറപ്പുനല്‍കി.