വിവാഹദിനത്തില്‍ യുവതിയ്ക്ക് നിര്‍ബന്ധിത കന്യകാത്വ പരിശോധന; ഭര്‍ത്താവിനും മാതാപിതാക്കള്‍ക്കുമെതിരേ കേസ്

ജയ്പുര്‍: രാജസ്താനിലെ ജയ്പുരില്‍ 24കാരിയായ യുവതിയെ നിര്‍ബന്ധിച്ച് കന്യകാത്വ പരിശോധന നടത്തിയതായി പരാതി. ഭര്‍ത്താവിന്റെ മാതാപിതാക്കളാണ് യുവതിയെ നിര്‍ബന്ധിച്ച് കന്യകാത്വ പരിശോധന നടത്തിയതെന്ന് പോലീസ് പറഞ്ഞു. പരിശോധനയില്‍ യുവതി പരാജയപ്പെട്ടു എന്ന് ചൂണ്ടിക്കാട്ടി ഭര്‍ത്താവിന്റെ വീട്ടുകാര്‍ തന്നെ ഒഴിവാക്കിയെന്നും പഞ്ചായത്ത് ചേര്‍ന്ന് തന്നോട് 10 ലക്ഷം രൂപ നല്‍കാന്‍ ഉത്തരവിട്ടെന്നും യുവതി പരാതിയില്‍ പറയുന്നു. ഭില്‍വാരയില്‍ വെച്ച് മേയ് 11നായിരുന്നു യുവതിയുടെ വിവാഹം. എന്നാല്‍ ആദ്യദിവസം തന്നെ യുവതി കന്യകാത്വ പരിശോധനയ്ക്ക് വിധേയയാക്കപ്പെടുകയായിരുന്നു. പരിശോധനയില്‍ പരാജയപ്പെട്ടു എന്ന് ചൂണ്ടിക്കാട്ടി ഭര്‍ത്താവും കുടുംബവും തന്നെ അപമാനിച്ചുവെന്നും മേയ് 31ന് പ്രാദേശിക ക്ഷേത്രത്തില്‍ വെച്ച് നടന്ന 'ഖാപ് പഞ്ചായത്തി'ല്‍ തന്റെ കുടുംബത്തോട് 10 ലക്ഷം രൂപ നല്‍കാന്‍ ഉത്തരവിട്ടതായാണ് പരാതി. വിവാഹത്തിന് മുമ്പ് അയല്‍വാസി തന്നെ പീഡിപ്പിച്ചിരുന്നുവെന്ന് പെണ്‍കുട്ടി ഭര്‍ത്താവിന്റെ മാതാപിതാക്കളോട് പറഞ്ഞിരുന്നു. ഇതുമായി ബന്ധപ്പെട്ട് സുഭാഷ് നഗര്‍ പോലീസ് സ്റ്റേഷനില്‍ ഒരു കേസ് നിലവിലുണ്ടെന്നും പോലീസ് പറഞ്ഞു. ''ഉച്ചയ്ക്ക് ശേഷമാണ് കന്യകാത്വ പരിശോധന നടത്തിയത്. അതിന് ശേഷം രാത്രിയോളം അവര്‍ ചര്‍ച്ച നടത്തി. ഭയം കാരണം എനിക്കൊന്നും പറയാന്‍ സാധിച്ചിരുന്നില്ല. തുടര്‍ന്ന് ഭര്‍ത്താവും ഭര്‍ത്താവിന്റെ മാതാപിതാക്കളും മര്‍ദ്ദിക്കുകയായിരുന്നു'. യുവതി പരാതിയില്‍ പറയുന്നു. സംഭവത്തെക്കുറിച്ച് വിശദമായി അന്വേഷിച്ചു വരികയാണെന്നും ഭര്‍ത്താവിന്റെ മാതാപിതാക്കള്‍ക്കെതിരെ കേസ് എടുത്തിട്ടുണ്ടെന്നും ബാഗോര്‍ എസ്.എച്ച്.ഒ. അയ്യൂബ് ഖാന്‍ പറഞ്ഞു. ഐ.പി.സി. വകുപ്പുകള്‍ 498എ, 384, 509, 120 ബി പ്രകാരമാണ് ഭര്‍ത്താവിന്റെ മാതാപിതാക്കള്‍ക്കെതിരേ കേസെടുത്തിരിക്കുന്നത്.